Demokrasia? Aki?

DEMOKRASIA? AKI?

Bon siman! Bendishon i Pas na tur esnan ku a kustumbra di lesa mi kolumna. Awe mi ke bai bek na fundeshi di un derechi krusial den kada un di nos su eksistensha i esei ta demokrasia. E pregunta aki a drenta serka mi:

Mr. Scheperboer por fabor splikami kiko ta Demokrasia? Dikon bos di pueblo ta rasoná pero no manera pueblo ke? Mi ta un mama soltero humilde ku ta biba den kas di FKP; tur dia mi tin problema ku mi kas, mi tin problema ku koriente i mi yu su skol. Un situashon hopi tristu. Mi a vota pa mi por haña tur e kosnan ariba menshoná drechá pero ainda gobièrnu ni niun hendeno a yuda mi. Kiko mas mi por hasi?

Danki pa e pregunta, unu ku sigur ta sumamente intresante, laga nos ban wak kiko ta e definishon di demokrasia i despues riba e sirkunstansha ku señora ta bibando aden. Demokrasia ta ta un forma di goberná, “demos” ta nifiká pueblo, i e idea ta pa pueblo manda i goberná; e pueblo ta na mando.

Aki na Kòrsou e pueblo ta representá dor di personanan ku a organisá nan mes, of a wòrdu organisá den partidonan i ta hasi na mes eligibel den un elekshon liber dor di subi riba e lista di un partido.

Partidonan ku ta saka asiento mester forma e Gobièno ku lo representá e pueblo. Un mayoria tin ku traha un koalishon kaminda den un akuerdo di gobernashon nan tin ku bini ku e plan pa e promesanan hasí na pueblo bira realidat. Nan mester ehekutá loke pueblo ta deseá!

Kòrda bon ta 21 hende lo representá pueblo i mayoria biaha ta un koalishon, esta un kombinashon di partido tin ku forma un mayoria pa por tuma desishon; e minoria ta forma oposishon. Funshon di oposishon ta pa kontrolá na un manera konstruktivo un ehekushon korekto. Den temporada di kampaña elektoral tur partido ta hasi promesanan dushi. Pero últimamente señora mes por a ripará ku nada ku a primintí pueblo no a tuma lugá voral e parti sosial (problemanan manera señora a meshoná)

Den nos Areglo di Estado (Staatsregeling) ta pará ku tur hende tin derechiriba un dak riba nan kabes, formashon i un estudio na drechi, trabou, bon organisashon di salu, un bon medio ambiente i ta Gobièrnu mester sòru pa esakinan i no e suidadano mes. Aworaki ta bai tin un elekshon i señora i tur otro hende ku ta biba den situashon sosial asina tin un chèns pa kis nan representante den parlamento, nos órgano mas haltu ku ta representá pueblo i no nan mes.

Señora e palabranan aki mi ta dirigí na bo, no keda sin bai vota pasó  kisas bo a keda  desapuntá!, skucha i informá bo mes hopi bon i ami tambe lo skucha i informá mi mes bon pasó mi tambe ke pa NOS HENDE NAN bai dilanti soshalmente iami sigur lo duna pueblo mi rekomendashon. Pasó si e pueblo ta bon tur sobra kos ta bon  voral nos mester wak pa nos muchanan. Keda pendiente señora i bisa tur hende pa bai VOTA!