Pregunta, señora mi a tende un entrevista di señora na Radio Direct i señora a bisa ku no tin lei tokante ásilo polítiko si Venezolanonan yega Kòrsou. Señora por a splika dikon no tin lei?

Bon siman na tur mi fiel lesadónan. Hopi bendishon I ban wak e pregunta di siman ku tin di haber ku e selebrashon di independensha di Venesuela ku a tuma lugá dia 5 di Yüli ultimo. Fin di siman tabata aktivo ban wak kiko tin pa nos kombersa!

Pregunta, señora mi a tende un entrevista di señora na Radio Direct i señora a bisa ku no tin lei tokante ásilo polítiko si Venezolanonan yega Kòrsou. Señora por a splika dikon no tin lei?

Danki pa a skucha e entrevista i danki pa e pregunta, mi ta haña hopi bon ora nos suidadanonan hasi pregunta kritis asin’aki. Paso e problema di Venezuela ta toka nos tambe.

Asilo polítiko ta kaminda seguridad sosial den un pais no tei mas i kaminda un guera sivíl por tuma lugá. Dor di tantu problema sosial i inseguridat e suidadano ta buska un mihó bida i mayoria be nan ta buska un pais ku nan sea tin laso ku ne, un pais ku tin Demokrasia of un pais den serkania.

Den e kaso di Venezuela e pais tin laso nan hopi estrecho ku Kòrsou i visa versa. Nan ta konosí di bin ku barku di fruta i bèrdura akinan, esei kemen ku nan konosé e ruta riba laman kaba. Si a kaso problemanan na Venezuela bira di tal índole ku niun hende no soportá promé lugá na bista ta Kòrsou i otro pais den bisendario.

E problema pa Kòrsou ta ku nos no tin un lei ni un maneho pa ásilo polítiko, esei ta hasi nos hopi vulnerabel. Ya kaba nos a mira den pasado ku un ásilo polítiko no ta haña un yudansa na drechi. E no ta wordu dokumentá ni e ta wordu registrá. E problema ku esei ta ku bo tin set di hende ku ta kana los riba bo pais anto bo no tin grip riba nan. Bo no sa kiko nan ta hasi ni bo no sa ku ken nan ta anda of tin kontakto ku ne.

Esei ta trese un problema den bo òrden i seguridat públiko, den bo seguridat sosial, laboral i ekonómiko. Den tempu di terorista ku nos ta bibando aden mester tene kuenta i sòru pa bin un lei i maneo hopi lihé. Kòrsou su strafrecht  o sea lei penal tin konkordansia ku Hulanda. E ora ei meste adaptá e lei pa ku ásilo politíko. Nos no mester warda pa e baka hoga na pos, nos mester premirá i antisipá kiko por pasa i tra un maneho mas lihé posibel. Kòrso ta hopi chikítu i no por akapará hopi hende i voral si no tin un maneo pa nan. Mi tin sigur ku na Aeropuerto ta hasi nan trabou i wardkosta tambe. Pero manera semper ora tin deseperashon hopi hende ta hasi kosnan ilegal pa jega Kòrsou i trafikashon di hende ta kastigabel.

Pues ya bo sa, awendia tur informashon ta na nos punta di dédé, no laga nada kue nos di sorpresa tresiendo un desbalanse den nos òrden i seguridad públiko. Bon siman!