SUPERMERKADO TAMBE TA BINI NA REMARKE PA KASTIGU

Dia di Mama ta tras di lomba. Hopi di nan meresé bendishon i energia positivo pa sigui tra. Ami ku ta mama, yu di mama i ta biba ku alegria i pena di hopi mama rònt mundu ke bisa kada un di bosnan, bo di bon ta na kaminda! Un felís siman pa tur mi lektornan nos tabatin un siman hopi eksitante tras di lomba,  e representantenan di pueblo a skohe a yega na un akuerdo di gobernashon ku por sierto tin hopi atenshon pa e hende (sosial). Na tur e Parlamentarionan nobo ku huramentá pabien! Na esnan nobo, sòru pa bosnan ta e ehèmpel pa nos tur. Kòntròl severo de MEO den supermerkadonan tabata nesesario basta tempu kaba, un bon trabou di MEO!. Sr. Ronny Cornelis un empleado di Gobièrnu, ku su tim profeshonal a mustra un biaha mas ku mester ehersé responsabilidat sin tapa bista sin bèk! Esei ta ehèmpel pa hinter pueblo.

Pregunta: Señora mi ta hopi kontentu ku e trabou di gobièrno pa kontrolá produktonanan di konsumo riba na fecha di kaduká, ami mes, semper ta reklamá e supermerkado pasó tin bia den purá mi ta kumpra produkto kaduká nèt ora mi bai pa kambié masha kos e mènèdjer ta hasi pa troka e produkto kaduká pa unu ku ta  bálido ahinda, mi pregunta ta e supermerkado nan aki ta haña un sorto di kastigu?

Danki pa e pregunta, I promé ku kontesta e parti di haña straf si òf no, mi tambe ta aplaudí e kontrol di Meo, pero ta algu ku mester a tuma lugá basta dia kaba pero manera e dicho ta bisa, mihó lat ku nunka. Den kuadro di bestuursrecht,(derechi atministrativo) ora ku inspektornan hasi tipo di kòntròl aki nan tin diferente medio ku nan por apliká na momentu ku konstatá inkumplimento ku regla. Preshon bou di obligashon di pago, ta un medio kaminda finansieramente e instansha ku faya ku lei, mester di un montante di sen pa stop ku e inkumplimento of evitá ku e ta ripití su mes atrobe. E sanshon aki ta pa prevení.

Maneho Obligatorio, (Bestuursdwang) ta un otro medio ku inspektornan di gobièrnu tin na nan disposishon ora no kumpli ku regla, e medio aki pa promové e fayo pa medio di un lei tèrminá e fayo ku e ta kometiendo. Si akaso e mes no tèrminá e fayo, e ora ei gobièrnu lo drecha e fayo riba kuenta di e inkumplidó. Esaki tambe ta den kwadro di reparashon.

Kastigu Atministrativo (Bestuurlijke boete) si no ta prevenshon ní reparashon esaki ta den kuadro di un straf pa esun ku ta den inkumplimento. Pa spanta otro nan. Prome ku bai over na duna but autoridat mester skucha e partido ku ta den inkumplimento promé i e fayo mester ta basá riba un lei i tambe mester ta bon kla na e esunku faya dikon i pakiko e ta haña un but. Dor ku e boete aki tin straf den dje autoridat mester tene kuenta ku algun regla di strafrecht, (kastigu penal) esaki segun tratado internashonal riba derechi humano.

Pues ya bo sa, nos tin un responsabilidat ku nos mes na promé lugá i esei ta kontrolá tur produkto ku bo ta kumpra pasó ta sèn bo ta paga i bo ta bezig ku alimentashon pa bo kurpa i bo famianan. Outoridat mester siguí kontrolá, implentá sanshon i informá su suidadanonan, pasó un kurpa i un mente saludabel ta garantía pa un bon futuro.