Dia di Labor

Na tur mi lektornan bon siman, i mi ta  spera ku Dia di Labor a laga kada un di bosnan ku insiprashon alegría i komprenshon profundo kiko e palabra ‘dignidat’ den trabou ta nifiká.

Awe mi ta para ketu na Dia di Labor, na nos trahadónan hòmber i muhénan fuerte den komunidat. For di esun ku ta bai  traha na bachi i dashi te na esun ku ta bisti üniform of ta bai  traha sin uniform i tambe esnan ku ta traha den nos aparato públiko.

Nos leinan laboral ku ta entre otro ‘Arbeidsbesluit’ i ‘Veiligheidbesluit’ 1, 2 i 3, aparte di ta bieu, ta inkompleto. Kòrsou ta miembro di e organisashon di laboral internashonal “International Labour Organization (ILO)”, un organisashon ku ta spesialisá riba tur área laboral. Nan ta duna rekomendashon riba tereno di derechinan di trahadó, oportunidat di trabou pa tur hende, i protekshon sosial pa tur trahadó.  Ku otro palabra, nan ta mantené i elevá e standard laboral internashonal. ILO ta duna rekomendashon riba e área aki i tur Pais miembro ta vota pa duna nan aprobashon. Di tur pais ILO ta invitá 2 miembro di gobièrnu, 1 representante di trahadórnan i 1 representante di dunadó di trabou pa asina tin un balansa entre tur e partidonan en kestion.

Tur pais ku ta miembro di ILO, ta implementá e stipulashonnan nobo den nan leinan nashonal pa asina e trahadó por ehersé su trabou den un ambiente sano, ku tur e instrumentonan nesesario i ku dignidat. Ora ku un trahadó tin tur loke ku e mester i tur e protekshon ku ILO ta stipulá ta na lugá, nos lo mira ku produkshon lo subi, absentísmo lo baha miéntras ku  strès di tur trahadó ta baha. Semper nos  mandatarionan  a bai e kongreso anual di ILO na Genève, i einan ILO ta trese plannan i rekomendashonnan dilanti pa tur pais. Tur hende ta tende tur kos, tur hende ta vota pero despues nada no ta pasa. Nos trahadónan ta keda den e mesun situashon di strès i sufriment

Tin hopi trahadó ku ta sufri boka ketu pasó nan ta pasa den intimidashon na trabou i ainda den e tempu aki, tin hopi hende muhé ku ta sèksualmente intimidá i si no duna oido na loke ta pidi di nan, nan ta wòrdu persigí i menasá. Nos trahadónan meresé mas respèt, i hustisia pasó nan ta forma parti di e aparato produktivo di nos pais.

A yega e ora pa trese kambio den e situashon aki pa un i tur, i si nos ta forma parti di ILO i si nos ta bai Kongreso tur aña na luna di Yüni, mester  kuminsá ku implementashon den nos leinan nashonal  i mester revisá i adaptá nos leinan na bienestar di nos trahadónan. Un pais ku su trahadónan ta sufri difísilmente por yega na un ekonomia finansiero fruktífero.

Pues ya bo sa, laga nos uni huntu pa trese kambio pa nos trahadónan i laga nos tur sigi traha ku honestidat, integridat i hustisia.

Kòrda semper: ”Bo no ta biba pa traha, pero bo ta traha pa biba”.

Nunka nos no ta kaba di papia,otro siman mi tei atrobe ku temanan pa abo habri bo wowo i mi ta habri pa tur pregunta riba areanan di lei ku bo tin. Te otro siman ku Dios su poder!