Mi por duna un volmacht pa un familiar vota pami ora di enfermedat?

Bon siman I bendishon na tur e fiel lesadónan di e kolumna aki. Un biaha mas danki pa tur e preguntanan I semper nos ta na bo ordu pa asisiti bo den tur tema ku bo mester di informashon legal ariba. Ban wak e pregunta di siman.

Pregunta: Kumbai señora, señora su kolumna ta hopi edukativo i mi ta hañ’é hopi interesante, mi tin dos pregunta pa señora e prome ta relashona ku elekshon di e aña aki i mi ke sa si aki ta pèrmití pa un persona haña volmacht di un familiar ku no por bai stem büro pa motibu di enfermedat òf pa motibu ku e ta biba aki pero ta na Ulanda pa motibu di enfermedat e fecha ku mester bai vota, esei ta posibel?

E otro pregunta ta kon bin nos hendenan den reinu no tin derechí di voto ora nan ta biba na Ulanda i e Ulandesnan si por vota asta ora nan ta biba pafó di Ulanda e ora ei mi kemen pafo di reinu! Nos gobièrnu tin derechi pasombra nan ta representá nos di tuma un desishon asina importante sin tene un referendum ni puntra PUEBLO ku ta e votadó?

Señora masha danki di antemano i pabien ku e presentashon ofisial di Partido Democraat, bosnan a impreshonami!

Danki pa e preguntanan, danki pa lesa e kolumna i tambe pa e felisitashon. Laga nos ban kontesta e prome pregunta. Na promé lugá for di aña 1968 Kòrsou a stòp ku vota mediante di ‘volmacht’, esta un poder. E motibu tabata ku a konstatá ku tabatin maluso i kumpramentu di voto. Lokel ku awendia ta kastigabel pa nos leinan. E asuntu aki tabata asina serio ku den un elekshon tabatin un partido a bai urna ku 6.000 poder i e otro ku 4.000 poder (volmacht) algu ku a hasi nos hendenan hopi preokupá pasó ta imposibel ku 10.000 hende no por a bai vota i a duna apoderashon.

Pa kontestá señora su pregunta: no ta asepta volmacht mas pa motibu di enfermedad, ni pasó e persona ta na Hulanda of kualkier otro parti di mundo. Kontesta riba e di dos pregunta. Nos mester hasi un separashon entre “ingeschreven” i “ingezeten”. Ingeschreven ta nos tur ku a nanse aki na Kòrsou, anto ingezetene ta tur hende ku ta biba na Kòrsou. Pa bo por vota bo mester ta “ingeschrevene en ingezetene”: dus “en, en”. Tin hende ta ingeschreven, pero no ta ingezetene mas. E personanan aki ta esnan ku mester a registránan mes in na Hulanda, por ehempel pasó nan ta biba feitelijk einan i nan ta registrá den un gemeente. Na Hulanda bo por vota estando for di pais si ta trata di elekshon pa Parlament di Europa of pa Tweede Kamer. Hulanda su leinan ta hasi esaki posibel, pero tur persona ku ta biba afo mester registra 6 luna prome ku elekshon.

Pues ja bo sa, kisas aki na Kòrsou nos por kuminsa pensa kon pa nos hendenan ku ta biba afo tog por laga nan voto konta. Nos por kuminsa studia kon Hulanda ta hasie i kon nos por hasie. Pero semper evitando ku por hasi mal usu di dje.

Tur kos bon, Pas, Lus, Amor I Fe! Te otro siman I nos tei semper pa bosnan tur!