Kiko mi por hasi na momentu ku mi deskubri “Bigamie”?

Bon siman na tur fiel lesadó di e kolumna tan gusta aki! Bon siman i ban wak e tema di siman.    

Pregunta: “Señora Geraldine bon dia mi gusta lesa señora su artíkulonan, te ku awo a toka nami pa hasi pregunta mi ta den un situashon hopi tristu. Mi a kasá dos aña pasá ku un ekstranhero i awor mi a haña sa ke e ta kasá ku otro hende. Kiko mi tin ku hasi? E situashon aki tin mi hopi tristu pasó nos tin dos yu ku otro.”

Masha danki pa e pregunta, sigur un situashon hopi fèrfelu, laga nos ban wak kiko lei ta stipulá. E situashon ku señora ta den lei ta stipulé como Bigamie. Kiko ta Bigamie/ Bigamia? Bigamie ta ora un persona ku ta kasá i ta drai kasa ku un otro persona i no ta bisa ku e ta kasá kaba. Bigamie ta kastigabel pa lei. Si a kaso e esposa (o) nobo ta na altura ku e persona ku e ta kasá ku n’é ta kasá kaba e ora ei e esposa (o) nobo tambe ta kastigabel. Lei ta stipulá un kastigu di no mas tantu ku 4 aña.

Si señora a haña sa ku e mener ta kasá kaba, señora tin di tuma e paso nan hurídico nesesario si no señora por haña su mes den hopi problema. No ta importante kuantu aña bosnan tin kasá kaba, importante ta e momento ku abo a haña sa. E kasamentu lo wordu anula.

E instansia enkarga ku investigashon ta Ministerio Publiko.

Pa loke ta e yunan nan ta keda su yunan pasó el a bai di akuerdo ku e akto di a wek e yunan ku señora, nan lo keda karga su fam y e ta keda nan tata. Semper ta bon pa buska asistensia hurídiko serka un abogado.

Pues ya bo sa, awendia tin hopi hende ku pa un motibo of otro ta bisti maskarada te dia e kai. Informashon awendia ta na punta di dede, subi internèt i investigá ken bo tin bo dilanti promé ku bo tuma kualkier desishon.

Te otro siman ku Dios su poder!