Mama di mi yu no ke pa mi rekonose nos yu.

Un bon siman hopi bendishon na tur mi fiel lesadónan. Esta dushi, ambiente di Pasku a drenta i den fin di siman ku tur e yobida ku nos a haña, ma saka tempu pa bishita diferente área kaminda lusnan bunita ta kologá pa trese ambiente. Ban gosa di e temporada aki ku serenidat i rèspèt pa otro. Anto kòrda no fòrsa bo pòtmoni, bai trankil i segun bo forsa.

Ata e pregunta di siman:

Bondia, bon siman mi ta un tata hopi hostiná e dianan aki, mi partner ku mi tabata biba ku n’é a kaba di duna lus na nos yu. Nos tabata tin un problema i el a kore kumi foi apartement. Mi a purba di tur manera pa e pordonami, mi a yud’e durante su embraso ku tur kos paso ta mi yu tambe e ta karga. No ku awor ku nos yu a nasé e no ke pa mi rekonesé mi yu. Señora mi tin mester di yudansa.

Danki pa  e pregunta i laga nos ban wak kiko lei ta stipulá enkuantu e situashon aki i asina duna mener un lus. Rokonosementu di yu por tuma lugá, prome ku yu nase, na momentu ku op e yu, i despues. Si den kaso bo ta kasá ku e mama e yu ta di bosnan dos, pasó el a nase den matrimonio. Si ta biba ta biba ku e mama of e situashon ku kada ken ta biba den nan kas, mester hasi e proseso di rekonosementu. Komo no ta yu ku a nase den matrimonio e ta yu di su mama, e muhé ku a trese na mundu. Esei ta trese ku né ku e mama mester duna bo autorisashon promé ku por rekonosé e yu na kranshi. Segun lei outorisashon di e mama ta nesesario te ku 16 aña di e yu. Lei ta stipulá tambe ku si e yu hasi 12 aña e tambe mester duna su outorisashon.

Den kaso ku e mama no ke duna autorisashon i e tata ke rekonose e yu, lei ta stipulá ku esaki mester bai via di Korte; e asina jama “vervangende toestemming” o sea ‘Pèrmit remplasá’ Pa hues duna e yu tòg fam di tata ounke e  mama no ké, e tata mester kumpli ku sierto kondishonan. Esun prinsipal ta ku bo mester ta tata biológiko di e yu, rekonosimentu di e yu lo no stroba e mucha ni e mama, i tambe mama mester kòrda ku e mucha tin derechi riba e asina yama ‘family life’ esta ‘biba den famia’, manera tratado internashonal a dekretá. Nos por konkluí ku tin un lus na final di e tunel pa mener. Kòrda si ku rekonosementu no ta duna mener derechi outomátiko  riba e yu. Mener mester pidi esaki via di un Hues. Semper un abogado por juda pa hasi e kaminda mas fásil.

Tene na kuenta ku ora bo a rekonosé bo yu, ku bo tin deber di kriya bo yu, pasó abo ta bira su tata hurídiko, esei kemen ku e tin un laso familiar ku bo, e ta haña bo fam of un kombinashon di fam, i e ta bira bo heredero.  Pues ya bo sa, si bo partner no ke pa bo rekonosé bosnan yu i abo si ke, bo por kana e kaminda via di Hues na Korte i tambe den e proseso pidi “ouderlijk gezag” esta “ Derechi paternal”mes ora. Kòrda tur mucha tin derechi di sa di unda na ta bin i tambe derechoi di biba un bida den famia esta ‘Family Life!’