Kiko ta un gabinete Demishonario?

Bon siman i bendishon na tur esnan ku a kustumbrá di lesa mi kolumna. Hopi kos rondó di  e arena polítiko a tuma lugá e dianan aki i mi a hasi e promesa di kumpli ku tur pregunta ku abo por tin. Ban wak e pregunta di e siman aki!

Pregunta:Na promé luga danki ku e kolumna aki ta sali tur siman i danki pa kontesta pregunta di hendenan komun den nos komunidat. Mi a bai selebrá instalashon di e gobièrnu nobo, mi a pasa bon pero te ainda niun hende ei bow no por a splika mi kiko ta un Gabinete demisionario

Na promé luga danki pa e pregunta; unu ku den último luna a dominá media i tur skina di Kòrsou. Laga nos ban wak kiko ta un Gabinete Demishonario.

Den kaso normal e gabinte demisionario ta un ku a entrega su retiro na e representante di mas haltu di Reino, aki na Kòrsou ku ta Gobernadó, i ta keda Goberná na un nivel mínimo te ora haña un gabinte nobo. Den kaso di un krísis, ta pidi e kabinete pa temporalmente tuma e maneho te ora un kabinete nobo postulá. E gabinete tin mag di atendé asuntunan koriente so.

Mayoria bia un gabinete ta den krísis òf ta kai pasó no tin e konfiansa mas di e mayoria den Parlamento. E saki por sosedo pa diferente motibu ku no tin konfiansa mas. Aki na Kòrsou gabinete Koeiman  a kai ora Melvin Cijntje i Sherwin Leonora (PS)a kita nan sosten, riba e punto di zonifikashon. Na momentu ei Minister Presidènt a entregá retiro di e gabinete na Gobernadó. Hopi bia ta purba mediante di un kòmbersashon ku un konsehero p’asina purba remediá e gabinete. Si no logra mester bini elekshon nobo, pa pueblo por skohe un Gabinete nobo.

E trabou nan ku un Gabinete demishionario por ehersé ta limitá. Pero hurídikamente e Gabinete aki ta kompletamente autorisá pa bini ku un proposishon pa leinan nobo,tuma desishonan i tambe respresentá Kòrsou den eksterior. Ta importante pa e gabinete demishionario apstené su mes for di temanan of desishonnan ku ta kontroversial. Ta mihó laga esakinan pa e Gabinete ku pueblo mes skohe despues di elekshon. Tin hopi kontroversia riba e tema di ‘sigui of para elekshon’, i asta tin papia pa bai korte na Oropa pa entamá un kaso pa para elekshon. Loke mi por garantisá pueblo ta ku tanten esnan ku ke bai korte na Oropa no prosedé e kaso aki na Kòrsou i esei kemen foi korte na promé instansha te na final, NO por bai Oropa. Bon intenshon pero imposibel pa ehekutá di e forma aki.

Pues ya bo sa, yen hende ta papia i pretendé yen kos, pero semper buska pa bo sa e bèrdat, pasó awendia informashon ta na bo punta di dede.  Esaki ta djis e kuminsamentu. Lesa, puntra, konsentrá riba tur informashon ku bo haña i ami ta keda bande bo pa sigui konsientisá bo. No lubidá, nos ta trahando duru pa un Kòrsou ku ta bai benefisiá nos yunan den futuro.