Atenshon ora di kumpra tereno na korsou!

Bon siman, Kòrsou ta den ambiente total di Pasku, Sanikolas i union di fin di aña. Esei ta nifiká  ku maske kuantu kos negativo abo ta mira tur dia, sa ku bo tin un eskoho pa pidi kos bon na pia di Krus i i lo bo haña masha hopi; mas di loke bo pidi pasó e nunka no ta sera su wowonan anochi..ní pa abo ku ta sinti bo desolá i hasta bandoná…pero ban wak un otro tema ku semper ta un problema grandi pero tin hopi solushon!!

Pregunta: Señora mi ta un estranhero bibá permanente na Kòrsou, mi yunan a nase aki i mi ta traha tur dia, mi a logra hopi den mi bida i awor mi a jega na un punto ku ami i mi kasá ke kumpra un kas aki na Kòrsou. Mi a mira un kas te na paira manera nan ta bisa, pero mi ke tin sigur si por kumpra i kua punto mi mester tene na kuenta kuné; nos ke kumpra den bario di Trai Seru.

Na promé luga danki pa e pregunta i ban wak mener su kaso. Tur hende ku ta inskribí na kranshi i ku tin un sédula por kumpra un kas aki na Kòrsou. Na ora di kumpra un kas mester tene kuenta ku dos punto hopi importante 1: si ta un kas riba tereno propio òf 2: un kas riba èrfpagt.

Si bo ke kumpra un kas of un negoshi ku tin èrfpagt riba dje, esei kemen ku abo no ta bira doño di e tereno i es mas e kas of e negoshi tambe bo no ta doño di dje. E doño ta sea un partikular of Gobièrnu. E lokual ku abo ta kumpra ta e derecho di usa e tereno i e kas ku ta riba e erfpacht. Esei ta enserá ku aparte ku bo ta paga pa un kas bo tin di paga tur aña e lokual lei ta yama “erfpachtcanon’’ of hür, esaki tin di wòrdu pagá na doño di tereno of Gobièrno. Ta bon pa buska informashon na DROV si ta tereno di Gobièrno i si akaso esun ku ta bendiendo e derechi di ‘erfrecht’ ta outorisá pa hasi esei. E preis ku ta paga den e kaso aki pa e negoshi òf kas riba e erfpacht ta mas abou pasó bo no ta kumprando e tereno.

Si bo ke kumpra un kas riba tereno propio, den e kaso ei bo ta bira doño di e kas i e tereno tambe. Ku otro palabra bo a kumpra un pida di Kòrsou. E preis ku ta paga den e kaso aki semper ta mas haltu pasó bo ta paga pa e kas i e tereno. Notario ta e persona pa atendé ku kompra i benta di tereno i kas, niun hende otro. E ta e persona ku ta traha e akta di benta, transakshon di e kas, e akta di hipoték, kontrolá e aktanan, regla pagonan, i inskribí na kadaster.

Pues ya bo sa, kumpra un kas, ta un invershon grandi i ta bon pa ta informá kiko bo ta kumprando; un abogado por yuda hasi e parti hurídiko i asina bo sa si e persona ku ta bendiendo ta outorisá i tambe kiko bo deber i derechinan ta

Kòrda mi tei semper pa yuda i guia bo den kualke área legal ku bo mester

Gosa di e dianan i bòltu kada florin promé bo sak’e