Balor di E voto BLANKU!

Balor di E voto BLANKU!

Nos ta sigui den e bueltanan promé ku e próksimo elekshon i mi ta kumpli kue promesa ku mi a hasi, esta duna informashon amplio na e trayekto aki i kiko e ta nifiká pa kada un di nos. E pregunta aki a drenta serka mi:

Kumbai Sra. Scheperboer, mi ta un studiante i mi ta sigui Sra. su kolumna pasombra e ta hopi interesante edukativo i m’a siña hopi, p’esei mi ta tribi puntra Sra. si señora por yudami ku mi pregunta: Ki balor e voto blanku tin? I kon Kòrsou a haña derechi di voto! Pasombra nos ta den temporada di elekshon mi ke sa pa hasi un eskoho sabí!

  Un pregunta hopi aktual, laga nos bai den historia promé, na kuminsamentu di siglo 19 Mener Abraham Mendez Chumaceiro tabata e pionero; e promé yu di Kòrsou ku a LANTA PARA pa PAPIA Públikamente  DI E DERECHI di VOTO! E tabata traha komo “ Praktizijn’ den Korte di Hustisia i tabata tin kontakto ku tantu  hende influyente komo ku e Pueblo ménos pudiente. Den e tempu ei, derechi di voto tabata kontroversial pasombra e derecho ei a habri porta pa e senario polítiko di awendia.   Añanan despues mr. Dr. Moises da Costa Gomez na 14 di Mart 1948 a introdusí e derecho di voto den Staten i e la wòrdu publiká ofisialmente  18 di Mart 1948. E aña aki ta selebrá e 69 aniversario di DERECHI di VOTO GENERAL. Un aña despues na 1949 Pueblo di Kòrsou a bai urna pa promé bia ku elekshonan GENERAL PA HOMBER I MUHE te dia di awe, danki na dje nos ta biba den un Demokrasia en bes di bou di un Diktadura ku un tirano na mando, ku a toda kosta mester wordu evitá!! Tambe tin e Voto INVALIDO esaki ta unu kaminda e stembijljet a wordu marka vários kaminda o a skibi kos ariba! Sinembargo tur dos ta konta. E  balor di e voto blanku no ta bai pa niun hende. E ta un forma di protesta i e no tin niun influensha riba e kiesdeler!! Vota blanku i vota inbálido ta konta, pa sa kuantu hende a hasi uso di nan derechi demokrátiko. Voto blanku no tin influensha riba repartishon di asiento. Pa e konteo di e resultado i e ‘kiesdeler’, ta konta e voto depositá riba e kandidatonan so. Ta eroneo pa pensa ku voto blanku ta bai outomátikamente pa e partido mas grandi!

Sperando ku b’a keda satisfecho ku e kontesta. Den e próksimo simannan tin mas kos ku lo tuma lugá. Pues ya bo sa, mi ta keda na vanguardia pa abo no kai chikí. Un biaha mas laga nos hasi mas esfuerso pa kaba ku violensia den nos pais i mustra un komportashon síviko, pa nos mes, i pa nos yunan. Nos ta habri siman ku notisianan negativo komo resultado di violensha. Forsa na esnan ku a pèrdè nan ser kerí sea pa violensa of pa negligensha. Bendishon i te otro siman ku Dios ke!