Galiña sin pluma?

Bon siman na tur mi fiel lesadónan i ban sigui ku nos luna dushi temporada di karnaval. Den fin di siman mi a mira hopi kreatividat di nos pueblo i nos por yega leu. Pero semper tin temanan di tur dia ku nos ta bira lomba p’e. Esaki ta unu ku ta masha konosí i ku ta trese basta diskushon….

Pregunta: “Estimado sra. Scheperboer. Mi a divorsiá 7 aña pasá for di tata di mi yu menor di edat. For di e divorsio te ku awe nunka e mucha no a haña alimentashon. Konsiderando e fayo aki mi ke sa kon ta kana e kaminda legal pa haña e plaka aki ku e yu tin derechi riba dje ku forsa retro aktivo. Ami i su tata no ta na guera, pero e mester realisá ku e mester kumpli. Si el a kria tres yu di un matrimonio anterior ora mi yu a nase i tabata chikí, awor ku ami ta ‘onvermogen’ o sea sin un salario adapta na mi kosto haltu di bida, e mester kumpli ku su responsabelidat.”

Danki pa e pregunta unu sigur hopi lamentabel, pero un lus si ta, ku e vonnis su forsa ta pa 20 aña. Pero si ta nesesario por kana e kaminda di korte, si ainda e èks no a paga. Un otro bon notisia ta ku e èks mester paga te ora e yu hasi 21 aña. Si e yu ta studia ainda e èks mester sigui paga te na e momento ku e yu ta riba su mes. Ta di lamentá ku hopi hende muhé ta pensa ku un tata semper lo kuida i kria su yu, pero práktika ta mustra otro. Hopi di nos yunan no ta haña sosten finansiero for di nan tata. Ta e mama ta keda sintá ku su yu i tin di hasi tur kos pa e mucha.

Den un kaso manera di señora e vonnis ta bisa “bij voorraad uitvoerbaar”, señora mester buska un deurwaarder kobra pa señora; voogdijraad tambe por yuda. Si akaso e tata no ta traha mas, por laga pone beslag riba su pertinenshanan. Kas, auto, boto, motorfiets ets, ets. Si akaso e tata ta traha por pone beslag riba su salario tambe. E lokual e tin di paga ta bai bek for di dia di e vonnis te ku awor aki. E èks ta debe e yu un montante hopi haltu di alimentashon atrasá i nobo. Un abogado por yuda señora pa kanalisá e kobramentu i pone beslag via di deurwaarder.

Pues ja bo sa, un yu ta pa bida largu i pensa bon ku ken bo ke prokreáun yu. Kòrda semper ku, “foi un galiña sin pluma no por ranka pluma”.

Despues di divorsio e yu no mester ta víktima, papia iwak kon untu por yega na solushonnan na bienestar di esun inosente ku no a pidi pa e kai mei mei di un bataya!