KASAMENTU ENTRE PAREHA HOMOSEKSUAL POR BIRA UN REALIDAT?

KASAMENTU ENTRE PAREHA HOMOSEKSUAL POR BIRA UN REALIDAT?

Bon siman na tur esnan ku a kustumbrá ku e kolumna aki i danki pa tur e komentarionan positivo I konstruktivo. E siman aki mi ta para ketu na un tema ku semper ta trese basta diskushon I kontroversia. Ban wak e pregunta di siman:

Señora abogada bondia i bon siman, mi ta un hende muhé di 35 aña i mi tin mi trabou mi kas mi outo tur mi kosnan. Mi ta paga belasting meskos ku tur hende, e úniko diferensha ta, ku mi ta homoseksual i mi tin mi partner ku mi ta biba años ku n’éi nos ke kasa. Resientemente nos a lesa un ke otro den korant tokante kasamentu entre personan di e mesun sekso i ku esaki a bira lei na Alemania. E pregunta ta nos por kasa kaba of kon e asuntu ta hinká den otro?

Danki pa e pregunta i sigur unu hopi aktual na e momento aki i unu ku ta trese hopi kontroversia den tur sector i gremio. Laga nos ban wak kiko lei ta stipulá tokante kasamentu denter di partner di mesun sekso. Aktualmente nos lei sivíl ta bisa ku kasamentu ta entre un hòmber i un muhé. Tambe lei ta stipulá e kondishonnan pa por kasa. Esei ta trese  ku personanan di mesun un sekso no por kasa ku otro in prinsipio aki na Kòrsou.

Jurisprudentia(hurisprudensia) a dikta ku si personanan di e mesun sekso di Nashonalidat Ulandes kasa na Ulanda òf Boneiru òf riba kualke teritorio Ulandes nan matrimonio mester wòrdu registrá aki na kranshi. Esaki ta un forma di tòg kasa ku bo partner, registr’é di un manera legal. Si akaso bo ta un persona katóliko lo no ta posibel pa selebrá e matrimonio i haña bendishon den un misa pasó lei di beibel no ta permití esaki i nos kódigo tambe no ta pèrmití ni e kasamentu te pa kasa na misa. Tene na kuenta si, ku otro benifisionan ku partner nan ta haña pasó nan a kasa ku un pareha heteroseksual, lo no konta pa partner nan di e mesun sekso, manera derechi riba penshun òf seguro sosial. Esaki nan tambe jurisprudentia a dikta. Ta keda na nos parlamentarionan pa trese e debate aki den parlamento i pone e tema na diskushon.

Pues ya bosa, amor ta siegu i kurason no por surpasá rason. Apesar di tantu prohibishon dor di lei, tòg partner di e mesun sekso por registránan matrimonio i biba komo kasá ku otro aki na Kòrsou. Hopi di nos tin miedu di loke nos no ta ignorante p’é i riba e tereno aki falta hopi edukashon i informashon ahinda. Ta krusial  ora tin debate di gruponan ku ta representá parehanan homoseksual, pa nos tur partisipá, duna komentario konstruktivo i Semper keda ku menta habri! Bon siman i ban hasi kosnan kreativo pa nos yunan gosa di nan fakansi.