Keho kontra abogado

Señora Geraldine, bondia, mi tin un abogado anto mi no ta masha kontentu kon ela hiba mi kaso den korte; mi a perde sin tin mester, ariba sobadje e ta kobrami un prijs ku nos no a palabra ku otro, e resibu ku e ke pa mi paga mi no ta di akuerdo kune kiko mi por hasi?

Danki pa e pregunta, i laga nos ban wak kiko ta e un posibel solushon den e kaso aki. Korda ku ami no tin tur e hechonan di e kaso ta peseI mi ta trata di duna kontesta en general.

Tur abogado aki na Korsou mester kumpli ku sierto reglanan aki na Korsou; tin un lei ku yama Advocatenlandsverordering. E lei aki ta stipula i regula komportashon di abogadonan aki na Korsou.

E mes un lei aki, ta regel pa tin un organo yama Raad van Toezicht; e organo aki ta e instansha na unda tur hende por akudi si akaso nan tin un keho kontra di nan abogado. E sistema ku RvT ta traha ta hopi fasil pa aserka nan i no ta kosta nada. Lokual tin ku sosode abo mester skibi un karta splikando e motibu dikon bo no ta di akuerdo ku e abogado su prestatie of su deklaratie. E abogado tambe ta hanja oportunidat pa reakshona riba bo keho, i despues RvT ta yama partidonan pa bin dilanti pa atende e kaso. Despues di un tempu kortiko RvT lo duna su veredikto enkuantu e kaso.

Un abogado tambe por hinka un keho kontra di su kliente; mayoria bia ta paso e kliente no a paga resibu i aun mas si e abogado a purba varios bia pa kobra i e kliente no a mustra interes pa paga.

RvT por duna diferente sankshon despues di a kaba di trata e kaso, si por ehempel nan ta hanja ku e abogado ta kulpabel. E abogado por hanja un advertensha, un zundra, un skorsing te ku un anja, of esun di mas erg ta nan ta kita su nomber esei kemen ku e no por funkshona komo abogado nunka mas. Esaki a jega di sosede tantu na Korsow komo na Hulanda.

Pues ja bo sa, semper informa bo mes kuantu e servisio di e abogado ta bai kosta, puntra pa “algemene voorwaarden” i kiko presis ta bai pasa ku bo kaso i si bo abogado pidi bo sierto dokumentunan, trata na dune nan paso korda semper e kontenido di bo kaso ta abo so sa, bo abogado sa solamente lokual abo bis’e.

I prome ku kore bai RvT, trata di solushona of intermedia abo mes prome, tokante e problema paso RvT tambe ta hopi kritiko ora ta trata kehonan.