Ken Ta Responsabel? Konsekuensha di negligensha.

Un bon siman na tur mi fiel lesadónan. Hopi bia nos tur ta mira kosnan serio ta pasando riba nos pais i rònt mundu i tur e kosnan aki ta trese prekupashonnan grandi. Pero den tur senario ku presenta, semper e pregunta krusial ta keda ‘Ken ta responsabel?’. E siman aki mi ta bai para ketu na e pregunta aki.

Abogado Scheperboer-Parris felis siman. Siman pasá, un kriatura a bai laman ku su ruman mas grandi segun prensa, pa un motibu òf otro e kriatura aki a hoga na un laman kaminda tabatin un públiko respetá i hasta un ruman pa tira bista riba djé. Pa ami komo mama hopi tristu, mi ke sa, ken ta responsabel pa e kaso lamentabel aki n’e sitio kaminda el a bai landa? Ta falta di su mayornan e adultonan ku tabata einan, tabatin landadónan profeshonal na guardia? Unda e negligensha ta?
Danki pa e pregunta i  p’ami tambe un kaso sumamente lamentabel. Pas na restu di e angelito aki i forsa pa su mayornan. Den kaso asina aki ta difísil pa bisa ken ta responsa bel pa ku morto di e menor aki, paso mi no konosé hechos ni e srikunstanshanan di e kaso aki. Pero laga nos ban wak legalmente kiko ta derechi di un menor. Kòrsou mediante di Reino tambe ta parti na e tradado internashonal riba derechi di mucha. Esaki ta stipulá den e asina yamá ‘Kinderrechten Verdrag’. Den e tratado aki, tur pais ku ta miembro a primintí ku derechi di mucha lo wòrdu respetá i apliká. Tambe tur pais ku a ratifiká e tradado aki mester duna kuenta  i rason kada 5 aña na e Komité pa derechi di Mucha. Den e tratado aki ta regla kuminda, skol, bibienda, salubridat, religion, i responsabelidat di mayornan. E tratado ta duna indikashonnan di fayo den kasonan di maltrato, i guera, i tur detaye te ora e menor hasi 18 aña. Aki na Kòrsou tin diferente instansha ku ta sali na vanguardia di mucha i tambe por duna keho serka nan sin tin negligensha kontra di un menor.

Nos Kódigo Sivíl ta stipulá ku esnan responsabel pa un menor ta mayornan of esnan ku tin guia/tutela riba e menor. E sitio kaminda e menor a hoga mayoria bia, ta protehá nan mes dor di pone bòrchi kaminda ta atvertí ku “tur hende ta drenta awa bou di nan mes responsabilidat si nan no tin un diploma di landa.” Kiko e kaso a presís mi no sa pero loke nos tur sa, ta ku un kriatura ménor di edat tabata drif basta ratu, den laman kaminda tabatin basta hende presente. Outopsia di Lei so por determiná kiko a pasa eksaktamente ku e menor aki i dikon el a hoga. Si tin negligensha òf algu síniko (malisia intenshonal) autoridat lo atendé ku esnan responabel.

Pues ya bosa, tur mucha tin derechi i mester respetá esaki! Tur mayor tin obligashon ku nan yunan voral ora nan ta ménor di edat i mayornan mester kumpli ku nan deber. Landa ta dushi pero e por ta peligroso tambe. Nos no tin nada den man pero ora ta bai laman ku mucha nos mester ta SUPER kouteloso.

Anto promé ku mi yama ayó..kòrda siman krusial di elekshon a yega! E siman aki nos ta bai VOTA pa un gobièrnu nobo i kisas hopi di nos no sa ainda pa ken òf pakiko  nos ta VOTA. Mi konseho:Semper buska sabidoria divino promé pa guia nos. E mensahe ku nos a haña ta hasi bo mes e pregunta aki; “Kiko mi ke? Desaroyo of Desaster?, Demokrasia of Anarkia ilegal?”

Ami tei semper pa duna bo un bon konseho. Ban pa nos pais su progreso, trankilidat i bienestar.