Kiko ta e diferensia entre un sospechoso i un kondenado?

Bon siman i danki pa e preguntanan. Mi ta spera ku bosnan tabatin un dushi fin di siman! Ban ku e pregunta di siman mesora:

Señora bon dia, mi ta tende den diferente programa polítiko komentario tokanto sospechoso i akusado, ami no ta komprondé nada mas señora por splika kiko ta e diferensia entre un sospechoso i un kondenado?

Danki pa e pregunta i sigur unu hopi interesante. Den e último lunanan ku ami a kore kampaña ami a haña e pregunta aki serka hopi hende i na mi pareser hopi no ta komprondé muchu bon kiko e diferensia ta i ta hasi e pregunta robes i asina haña e kontesta robes. Un sospechoso ta un persona ku tin sufisiente sospecho i motibu pa pensa ku el a kometé un akto kastigabel dor di autoridad i segun nos kódigo penal, dus no ta sufisiente pa un polis of un hende a base di sentimento of intuishon pensa ku un persona a kometé un akto kastigabel. Lei ta stipulá ku bo ta sospechoso, ora tin basta sospecho ku bo a kometéun akto kastigabel, bo a kai den man di Ministerio Públiko i bo ta wordu persiguí. Kòrda un sospechoso NO ta un kondenado pasó e por sali líber ahinda. Tur kos ta dependé di e akusashon kontra di dje i kon bon su abogado respresente den sala di korte.

Un kondenadó ta un persona ku tabata sospechoso i ku su kaso a bai dilanti hues dus el a wòrdu persiguí i el a wòrdu haña kulpabel dor di un hues i mester sinta un kastigu. E por sosedé ku un akusado no ta di akuerdo ku el a wòrdu hañá kulpabel, lei ta duna e persona oprtunidad pa hasi un apelashon riba e sentensia ku el a haña esei nos ta yama Hogerberoep. E kaso lo bai  dilanti tres hues i nan lo atendé e kaso kompletamente di nobo. Ojo sí, pasó den un proseso di Hogerberoep bo por haña mas kastigu riba e sentensia anterior. Despues di Hogerberoep bo no ta di akuerdo bo por bai den Cassatie serka Hoge Raad na Hulanda, e kaso lo no wordu atendé di nobo solamente ta wak si e regla nan formal i lei a wordu apliká i splika manera mester ta.

Pues ja bo sa, ta importante pa sa ki ora bo ta sospechoso, pasó autoridad tin sierto deber ku nan tin di hasi manera, detené bo, interogabo, i sera bo. Sa si ku abo tambe tin derechi i esun mas importante ta pidi pa bo abogado i no papia nada pa no kondená bo mes. Bo por skohe pa keda ketu te ora bo abogado presentá. Sòru pa bo hasi bo best kumpli ku regla pa bo no kai den man di autoridad.

Korda nos tei semper pa duna bo tur konseho ku bo mester te otro siman ku Dios su Poder!