Kiko ta e korte di derechi humano na Hulanda?

Bon siman i bendishon na tur esnan ku ta lesa mi kolumna. Nos ta sigui den e buelta di elekshon i tur loke ta tumando luga prome ku 28 di aprel 2017. Nos pueblo meresé informashon al kaso i mi ta sòru pa bo haña tur!

Pregunta: Señora abogado Parris un siman bendishona pa bo, ami ta un mama huntu ku mi famia, nos tambe a biba un par di luna den hopi tenshon i inseguridat tokante di e tema vota dia 28 april si òf nò. Ami ku mi kasá hasta a kombersá pa nos bai biba Hulanda of Bonaire kaminda tin trankilidat, i stabilidat pa nos muchanan. Mi ta kontentu ku a anunsia ku elekshon ta sigui. Awor e pregunta ku mi ke hasi ta mi a kompronde ku grupo 12 a bai korte di derechi humano na Hulanda, kiko e korte ei ta? I kiko nan ta hasi?

Na promé luga danki pa e pregunta unu ku lo bai den buki di historia aki na Kòrsou. Laga nos ban wak kiko ta Korte di Derechi di Humano. E korte aki ta forma parti di e órgano di Raad van Europa, esnan ku por bai hasi un keho na e korte aki ta individuo, gruponan, organisashonan i paisnan. Nan tur por hinka un keho kontra di un miembro di estado  dor di hasi un petishon riba e tratado ku ta protehá derechi di hende. E dekretonan di e korte aki ta fiho i ta definitivo. Ku otro palabra  ora korte aki duna un dekreto esei ta final no por bai niun korte superior ku n’é. E kondishonan pa ku atmishon na e korte aki ta; esun ku ta entamá e kaso mester ta e víktima di violashon di un derechi fundamental ku ta establesé den loke nos konosé komo “Europese Verdag Voor de Rechten van de Mens” e tratado Oropeo pa Derechi di Hende. E keho mester ta dirhí kontra un instansha públiko; e korte aki ta e último salbashon (dus e persona mester a hasi uso di tur medio legal aki na Kòrsou promé. For di korte den prome instansha te ku  Korte Superior, sino e kaso no por wòrdu tratá na Korte Oropeo; i por último e kaso mester wòrdu entamá denter di seis luna despues di e desishon nashonal. Si ta bin na remarke Korte ta wak promé si por jega na un akuerdo, e korte mes lo intermediá. Si no logra e ora ei ta bai determina si tabata “violashon di e tratado Oropeo. Si esei ta e kaso e ora ei e Korte ta pasa over na loke ta yama “Genoegdoening”. Ku otro palabra e veredikto di korte ta definitivo i mester sigui e pasonan ku korte a stipula! Esei kemen esnan ku a hinka un kaso na Korte Orope, mester sòru pa kumpli ku nan pe e violashon ku a tuma lugá no sosede nunka mas. Hasta tin biaha mester tuma medidanan, of kambia lei.

E kaso ku blòki 12 a hiba EU Hòf no a kumpli ku e kondishonnan pa por ta atmisibel. Unu ku sigur no a kumpli ku ne ta mester a prosedé prome na Kòrsou i Ulanda promé ku bati na porta di EU Hof. Ta p’esei a deklará nan “niet ontvankelijk”(no atmisibel). Ku otro palabra Korte Oropeo no ta ní bai lesa e kaso pa sa kiko e ta kome of bebe. Ta p’esei Blòki 12 a haña nan ta kanta otro kantika i a realisá nan mes ku Elekshon ta sigui, manera Gobernadó a dekretá basta dia kaba. Nan lucha tabata un gastamentu di sèn, tempu i energia. Pero loke si nos por bisa tantu Blòki 12 i pueblo en general a siña i nos tur por a ripará ku tur hende a buska pa sa kiko e bèrdat ta.

Pues ya bo sa, nada no ta pasa pòrnada nos tur a siña un lès masha importante mes, semper purba di remediá e problema entre nos ku nos i skucha tur hende i tur eksperto promé ku bai bati na porta di Reino pa haña rason, pasó ata e aanwijzingm(instrukshon di Ulanda) na kaminda. Laga nos tur lesa bon i kompronde kiko ta pasando na Kòrsou. Mi tei semper na bo òrdu.