Kiko ta “Oproepcontract”?

Bon siman na tur esnan ku a kustumbrá ku e kolumna aki.  E fin di siman aki tabata unu bendishoná i di Famia! Esei ta loke mi ke pa nos tur konsentrá riba dje. Ta na famia nos bida a kuminsá. I si nos keda huntu nos tur a krese i bai dilanti! Ban wak e pregunta di siman. Trabou ta e base di bo bida p’esei mi ta para ketu na e tema aki:

Pregunta:M’a  haña un oferta pa traha na un resort, anto m’ a haña un kontrakt ku yama “oproepcontract” pa firma. Mi no ta komprondé kiko ta un “oproepcontract”.

Danki pa e pregunta, i laga nos ban wak kiko e esensia di “oproepcontract” ta. “Oproepcontract” ta e parti flèksibel di ehersé trabou; esei ta nifiká ku en prinsipio un persona no tin oranan fiho pa traha. E trahadó ta ehersé su trabou solamente ora yamé pe bai traha:

Tin dos posibilidat pa jama un hende pa trabou:

1. E dunadó di trabou no tin obligashon di yama e trahadó bin traha ora tin trabou i trahado no mester bin trabou.

Na e momento ku e trahadó kuminsá ehersé su labor, e kontrakt ta kuminsà i e ta konta pa e oranan ku b’a traha só.

Por ehèmpel si b’a traha dos ora ta paga bo pa e dos ora nan ei só.

2. E otro forma ta e asina yama “nul-urencontract”, den e kontrakt aki no tin ora stipulá aden. Dor ku no tin kantidat di ora stipulá den e kontrakt e dunadó mester  paga bo mínimo

3. Por ehèmpel si b’a traha 15 ora of ménos den un siman, e dunada di trabou mester paga bo e tres oranan pa kada bia ku b’a traha maske ku              b’a bai kas òf a stòp di traha despues di un ora.

E partinan negativo pa e trahadó ta, ku e trahadó no ta haña pago  si e bira malu. E tipo di kontrakt aki ta trese hopi inseguridat, e trahadó no tin siguransa ki dia e ta bolbe na trabou i fin di luna e sèn no ta sufisiente. Ta p’esei wak bon ki tipo di kontrakt bo ta firma i si e ta kumbiníbo. No laga niun hende hasi mal uso di bo djís bo mester di trabou.

Pues yaa bo sa, ora bo haña bo ku tipo di kontraktnan asina, ta importante pa bo sa  esensia di e kontrakt i kiko bo derechinan ta. Importante ta, pa bo no firma sin guia, pasombra e materia di “oproepcontract” aki, ta basta kompliká.

Bon siman kòrda nos tei semper pa yuda bo!