Kuenta bankario separa?

Intro bon siman na tur mi fiel lesadónan. Nos ta kla pa inisio di temporada di festival di Tumba ku hopi aktividat i eventonan. Vários kos nos tur mester bai tene kuenta ku n’é i un di nan sin duda ta nos trabou! Esaki ta e pregunta ku mi a haña i ku gustosamente mi ta kompartí ku bosnan.

Pregunta: Ami ku mi kasá, kada un di nos tin nos propio kuenta bankario… I awor ku nos ta kasá nos ta bende paña (komo bijdjop, no ta algu fiho) i loke ta e ganashi ta bai riba mi kasa su kuenta bankario. Mi kier a sa si nos tin ku jega na divorsio loke e tin riba su kuenta, lo ta pa e so? Nos no a kasa ku “bienesnan separá”..Semper tabata asina ku loke ta di mi ta di dje i vise versa, pero últimamente nos ta konfrontando problema i el a bisa mi ku e lo ke divorsiá. I mi no ke pa loke nos a konstruí huntu mester tèrmina enbano.

Danki pa e pregunta i unu sigur hopi interesante, pasó ora nos kasa ku otro nos tin tur e intenshonnan di mas miho pa ku otro i al final kasamentu ta pa prokrea i buildup huntu ku otro. Pero laga nos ban analisá bo pregunta ku lokual nos leinan ta stipulá.  Asina bosnan a kasa ku otro tur loke ta di dje ta di bo, paso bosnan ta kasá “binnen gemeenschap van goederen”. Den e kaso aki e sèn ku ta bai riba su kuenta tambe ta di señora. Awor mester wak si, ku e sèn ku ta bin foi bosnan bijdjob si ta huntu ta use, sea pa debenan di kas of vakantie ets, ets. Dikon esaki ta importante? Paso ora divorsio kai, den e proseso e kasá mester por duna un stand van zaken di e kuenta bankario i kuantu sèn a bai den huishouding ets., ets. Asina por jega na lokual realmente mester repartí den bosnan dos.

Semper ta bon pa purba regla e asuntu di plaka den bosnan dos, promé ku yega dilanti un jues of promé ku hasi petishon di divorsio. Por lo tantu pensa bon si bo ta siguí ku bo bijdjop i den kua forma bosnan ta siguí kune. Kisas mester wanta un ratu i defení si en berdad bosnan ke divorsiá si of no. Semper por regla kon bosnan ke divorsiá prome ku presentá dilanti di hues, esta via di un echtscheidingsconvenant. Aki den bosnan dos mes, a definí den un bon komprenshon ku otro kon ta repartí  plaka i regla otro asuntonan.

Si akaso ke sigui huntu ku bijdjop ta konsehabel pa habri un kuenta apart i institushonalisá  bosnan benta di pa asina hasié ofisialmente. Pues ya bo sa, ta bon pa kada persona tin nan mes kuenta di banko pero plaka ta keda plaka ta bon pa defení foi prinsipio riba kua rekening plaka extra ta bai i pa kiko e lo wordu husa, asina evitando ku un dia mester tin diskushon tokante di plaka. Bon siman, bendishon i tur kos bon.