Mi a kasa na aña 1995, mi kasá ta estranero i ami ku n’e ta bibando for di 2008 na Kòrsou; mi kasá tin un pèrmit temporal ainda, despues di 23 aña kon ta posibel?

 

Bon siman na tur mi fiel lesadónan. Fin di aña ta den kurpa i  nos tur ta sintiendo e ambiente di tradishonnan di Kòrsou. E trayekto di transishon di gobièrnu a tuma su tempu. Dios ta para i nos tur ta progresá!

Pregunta: mi a haña un pregunta for di un gran amigu di mi, danki pa e pregunta. “Mi a kasa na aña 1995, mi kasá ta estranero i ami ku n’e ta bibando for di 2008 na Kòrsou; mi kasá tin un pèrmit temporal ainda, despues di 23 aña kon ta posibel?”

E asina yamá Landsverordening toelating en uitzetting (LTU) ta regla pa esnan ku mester di un pèrmit keda aki na Kòrsou, semper i kuando nan kumpli ku e rekesitonan. Tur hende ku ta kasa ku un Ulandes ta haéa un pèrmit di estadia pa un aña, despues di sinku aña e persona por bin na remarke pa un pèrmit pa sinku aña i despues di esei e por bin na remarke pa un pèrmit permanente.

Despues di tres aña kasá e persona por hasi petishon pa bira Ulandes, semper i kuando e no haña niun “buraku” durante su estadia. Mester hasi e asina yamá “inburgeringstoets” promé. Ántes esta promé ku 1986 tur estranhero ku kasa ku un persona di nashonalidat Ulandes por a bira Ulandes mesora despues di kasamentu. Meskos ku esun ku tin tres aña kasá i bibando 15 aña aki na Kòrsou sin un buraku por bira Ulandes, sin mester di hasi e asina yamá “inburgeringstoets”.Tur loke ta konta pa esnan ku ta kasá ku un Ulandes ta konta tambe pa esnan ku tin konviviensa ku un Ulandes. Den e kaso spesífiko aki, mester wak dikon e señora ainda tin un pèrmit temporal. Mi tin sigur ku ta un proseso hopi fásil pa kanalisá i hasi e kambionan nesesario. Un puntu hopi importante pa e estrahero ku ta kasá ku un Ulandes ta, ku e  por traha sin pèrmit di trabou. Tur su yunan ku nase den matrimonio automátikamente ta haña e nashonalidat Ulandes.

Ya bo sa, na aña 2006  minister di Hustisia, di e tempu ei, a dekretá ku e no ta aseptá  kombibensha mas i ta rekonosé matrimonio so, entre Ulandes i un estranhero. Si bo tin un partner estranero i bo ke pa e bin biba serka bo aki na Kòrsou, e ora ei bo mester kasa ku n’é promé i si akaso e ta ilegal aki na Kòrsou mi ta konsehá  pa bo kasa ku n’é na su pais natal, pa despues hasi tur e tramitenan di manera ku bo por kasa I biba ku n’e na dushi Kòrsou.

Hopi desaroyo interesante e siman aki ban wak