Mi a perde mi kasa den aksidente, kiko mi por hasi?

Bon siman na tur esnan ku ta sigui e kolumna aki tur djaluna. Ban habri siman ku speransa i dedikashon na loke ta di nos, pa progreso di Kòrsou! Ban wak e pregunta di siman I e konseho ku mi ta duna:

Pregunta: Mi kasa a  haña un aksidente den tráfiko i pa motibu di leshonan ku e la haña mi kasá a fayesé. Nos tin dos yu ménor di edat -un di 8 aña i e otro di 12 aña.  Ma keda mi só ku e muchanan. Promé ku mi kasá fayesé nos tabatin dos entrada awor mi tin mi entrada so.  Kiko mi por hasi pa haña rekompensashon pa e entrada ku ami tatin i ku pa motibu di e aksidente mi a pèrdè mi kasá?

Na promé lugá danki pa e pregunta i mi kondolensha na señora, hopi forsa i ku Dios lo sigui guia señora den e dianan aki. Laga nos ban wak kon kontestá e pregunta aki. Den nos lei e buki di ‘strafvordering’ tin un figura ku jama ‘voeging’. Voeging ta un manera hopi importante pa e partido ku ta hiba pèrdidá pa rekubrí su daño riba e “dader” ku a okashoná morto di un otro.

Ta trata e ora ei di un kaso sivíl den un kaso penal. Hues no tin hopi tempu pa evaluá e daño ta p’esei ta importante pa sa fo’i delantá  kiko i kuantu bo ta klaim. Importante ta pa bo motivá bo klaim i sostené ku tur prueba. Si akaso bo klaim ta kompliká ta mihá bo bai un Hues Sivíl fo’i kuminsamentu.

Kòrda tambe ku e vehíkulo ku a okashoná e aksidente ta sigurá kontra di daño na tersera, ei nan tambe por hiba un klaim direkto na e kompania di seguro. Aki tambe ta importante pa motivá i sostené bo klaim hopi bon.

Na Kòrsou tin instanshanan ku ta yuda víktimanan manera den e kaso di señora ku voeging den kaso penal i tambe tin spesialista ku ta yuda ku klaim kontra un kompania di seguro I un abogado ta duna asistensha. Na OM (Ministerio Públiko) tin formularionan spesial pa yena bo klaim of daño i e formulario mester ta den, promé ku e kaso yega korte. OM ta tene e víktima na altura di e kaso.

Voeging no ta pa tur hende. Hendenan ku ta víktima so por voeg den un kaso penal.  Esei kemen e víktima a hiba daño so. Un klaim lo wòrdu honrá solamente ora esun responsabel pa e aksidente a wòrdu haña kulpabel di tal echo. Si akaso bo klaim no wòrdu honrá, abo komo víktima no por entamá un apelashon na korte superior.

Ora bo klaim wòdu honrá abo mes mester sòru pa kobransa di e klaim.  Kòrda ku un veredikto di Hues ta ehekutabel, esei kemen ku mester aserká un deurwaarder pa kobra pa bo. Un deurwaarder e ora ei por pone beslag riba tur propiedat di esun kulpabel(si e tin): “Van een kale kip kan je niet plukken.”

Den sala di korte, Hues ta hiba palabra promé, despues e fiskal. Si e víktima ta presente ku klaim nan ta haña chèns di hiba palabra i despues e abogado di sospechoso. E sospechoso semper ta hiba e último palabra.

Pues ya bo sa, bida semper ta yen buelta i sorpresa. Via di lei por  antisipá e sorpresanan aki pero semper ta bon pa informá bo mes, i un abogado por yuda bo ku konseho. Pero esei no ta kita si, ku nos mes por antisipá riba nos futuro. Tuma bo destino den bo mes man dor di dèk bo mes pa buelta i sorpresa di bida. Bendishon! Te otro siman  ku Dios su poder. Semper nos ta kla pa duna bo delaster un konseho ku bo mester!