Mi a tende ku tin un kambio faborabel pa suidadano den e lei di apelashon kontra di Gobierno?

Na tur mi lesadonan Felis 2016, salu, bendishon I prosperidat. E anja aki mi ta desea kada un di bosnan Lus, Amor I Pas. Ban wak e tema di e siman aki.

Pregunta:Mi a tende ku tin un kambio faborabel pa suidadano den e lei di apelashon kontra di Gobierno?

Awe mi ke atende un tema di apelashon ku por hasi riba un desishon di un Minister, i e tempu stipula dor lei. E lei aki yama Landsverordening Administratiefrecht LAR. Nos tur sa hasi petishon serka gobiernu, sea pa traha un kas of pa un permit di trabou of negoshi i hasta pa organisa un fiesta. E prosedura pa hasi un petishon di kualke indole ta algu legitimo ku ta stipula den lei. Pero e ferfelu ta ku mayoria bia “Gobièrnu” ta lubida di duna un kontesta riba un petishon . Of tin bia ta rechasa e petishon di nos i asta por aprobe ku yen kondishon. Kualke desishon ku Gobièrno tuma riba un petishon ku un suidadano a hasi yama un dekreto of “Beschikking” Kiko por hasi?

Na momentu ku bo a hasi un petishon I bo no a hanja kontesta of “beshikking” bo tin mag di hasi un apelashon na e Ministerio ku mester tuma un desishon of na Korte. E “beschikking “aki na momentu ku bo resibi’e sea personal of via post, mester fiha kuantu tempu tin skibi aden si akaso abo no ta di akuerdo ku e desishon tuma dor di gobiernu. Mi ta duna un ehèmpel :den kaso di un permit di estadia e lei ta stipula ku den 4 luna, despues ku a hasi e petishon, bo por hasi apelashon si Gobierno no duna bo un kontesta riba bo petishon. Si den e mesun kaso di permit di estadia bo a hanja un “beshikking” I bo no ta di akuerdo ku n’e, e lei ta stipula ku den 6 siman bo por hasi un apelashon. Tene na kuenta si, ku kada tipo di permit tin nan tempu di duna un “beschikking” i pa hasi apelashon. Esaki ta stipula den un lei partikular.

Laga nos sigui ku nos ehempel di un permit di estadia. Despues ku bo a hasi apelashon na gobierno, e ministerio mester kontesta bo dinter di 4 luna. Ora e ministerio no ta duna bo su beshikking riba bo apelashon, bo tin 6 siman atrobe pa apelá. E tempu di 6 siman mayoria bia e suidadano ta eksperensha esaki komo unu hopi kòrtiku pa hasi apelashon i si bo no konose lei e konseuensha mayoria di biaha ta, ku bo ta lat ku bo apelashon. E fèrfelu di e asuntu aki ta ku na momentu ku e 6 siman pasa anto bo no apelá, e desishon ei ta haña ‘poder di lei’. Esei kemen ku e desishon ei ta final i probablemente abo mester kuminsá kompletamente di nobo ku bo petishon.

Entrante di Sèptember 2015, a bin un kambio den lei di LAR(Landsverordening Administratiefrecht) ku ta hasi posibel ku maske bo ta lat bo por hasi apelashon tog. Esey kemen ku si akaso 6 siman pasa pa kualke motibu òf otro, no ta nada paso bo por hasi apelashon ainda. Esaki ta trese kune ku e persona ku hiba un kaso kontra di Gobiernu awor tin mas seguridat den lei, den e sentido ku si e no sa kiko e por a hasi ku un “beschikking” di gobiernu si e no ta di akuerdo ku n’e anto e no konose su derechinan, e ta haña sufisiente tempu pa apelá su kaso. Naturalmente bo no por warda si muchu largu pa hasi bo apelashon. Esaki sigur ta un avanse grandi I positivo pa nos pueblo i personanan ku ta hasi petishon serka gobièrnu. Pues ja bo sa awor bo sa kon bo ta para ora ku bo hasi un petishon pa kualke permit serka gobiernu. Na mi lesado nan, dor di hopi kompromiso mi ta sigui atende pregunta pero e kolumna ta sali 2 bia pa luna. Pero manera semper mi ta keda na bosnan ordu. Tur kos bon.