Mi eks kasa no ta pagando alimentashon pa nos yu, kiko mi por hasi?

Bon siman tur kos bon I danki pa lesa mi kolumna! Ban wak e tema di siman, algu delikado pero ku nos no por ignorá!

Pregunta: Mi tin 6 aña ku mi a divorsiá for di mi èks, nos tabata 15 aña kasá i nos a haña un yu muhé, e úniko yu di nos tur dos te ainda. Nos yu ta ménor di edat. Den e sentensia hues a dikta ku e mester duna pa 300 florin pa luna pa kria e yu. E promé seis lunanan e hòmber a paga korèkt na tempu. Aworaki ta 5 aña i mei ku nos yu mester a risibí pago, mi a trata di tur moda pero nada. Poko dia ei mi a komprondé  ku el a bai biba Hulanda; ki mi por hasi?

Danki pa e pregunta i sigur unu hopi interesante. Laga mi kuminsá bisa ku señora no ta so den e lucha aki, tin hopi hende muhé ku ta pasa masha hopi trabou  pa nan haña un tiki sèn pa nan yu. Hòmbernan mester ta mas serio ora jega na nos yunan. E muchanan tei i e tin e obligashon pa aportá i invertí den nan.

Den kaso aki señora tin un arma hopi importante den señora su man, esei yama “vonnis” den e kaso aki un “beschikking”  dekreto. Mi por komprondé ku despues di divorsio tur sobrá paso a tuma lugá pasó, si no inskribí  e divorsio na kranshi denter di seis luna despues di divorsio e ora ei señora ta kasá ainda. Pero laga nos bai bèk na e dekreto. E dekreto ei ta masha importante pasó eiden Hues ta tuma su desishon i partidonan mester honra e desishon ei, mayoria bia e ta bisa tambe den su desishon “uitvoerbaar bijvoorraad” o sea mester ehekuté manera a dikta e sentensia. Esei kemen ku mester hasi loke e dekreto  ta bisa sea bo bai ‘Hoger Beroep’(Korte Superior) òf no i te ora e tramité di hoger beroep tèrminá. Mester kuminsá  paga plaka di alimentashon mes ora.

Si bo èks no ta pagando bo mester bai serka un deurwaarder i laga e pone beslag riba salaris òf pertenesenshanan di balor di bo èks. E mester kumpli ku e sentensha di Hues. Un Vonnis of Beschikking tin e poder di wòrdu ehekutá si e persona no ta kumpliendo ku loke e vonnis of dekreto ta bisa ku mester tuma lugá. Kòrda ku vonnis of un dekreto di hues su valides di kaduká ta mas ku 5 aña; pa eksakto e ta 20 aña promé ku e kaduká.

Semper ta bon pa laga un abogado lesa e vonnis of dekreto pa bo, di manera ku e por konsehá bo ta ki paso mester tuma i  yuda pone bo riba e kaminda korekto. Pues ya bo sa, bo èks por kore pero e no por skonde pasó si ta na Hulanda e ta, un abogado tambe por poné den kontakto ku abogado na Hulanda pa buska bo èks  i asina pone beslag i pone paga ku forsa retroaktivo tur e añanan ku e debe bosnan yu. Te otro siman ku Dios su poder i bo sa kon pa yega serka nos pa mas yudansa!