Mi ke divorsiá, kiko ta un echtscheidingsconvenant?

Un konbenio di divorsio ta un kontrakt entre pareha kaminda nan ta stipulá kon nan divorsio lo kana supel y bon. Den e kontrakt aki e pareha ta hasi un akuerdo ku otro kon nan ke divorsia. Nan por regla por ehèmpel, nan kas, e yunan, alimentashon, repartishon di sen di spar, penshun, debenan, impuesto, ets. Un hues lo divorsia e pareha di akuerdo ku nan konvenant, i tambe duna e kontrakt aki forsa di lei. Esey kemen, si un partido no a kumpli ku e konvenio e otro por instruí un deurwaarder pa obligá e otro pareha pa kumpli ku su palabrashon, anto e por hasi esei sin bai un hues.

Parehanan mes por traha un konbenio di divorsio, i tambe nan por aserka un abogado pa hasi esaki pa nan. Ta konsehabel pa buska asistensha hurídiko paso si bo no konose lei, bo por lubidá sierto puntonan ku ta di importansha i ora abo a lubidá algu hinter e prosedura por dura mas largu ku ta nesesario, paso e ora ei e hues tin ku atende tur e puntonan ku a lubida.

Ta importante pa tene na kuenta ku den e prosedura di traha un konbenio hopi pareha por eksperensia esaki komo un proseso hopi emoshonal paso pareha semper tin problema pa laga un bida huntu i propiedat atkertí huntu lòs. Pero den korte hinter e prosedura ta mas emoshonal, paso e partidonan no por ekspresa nan mes liber, paso nan no a yega na un akuerdo prome den un konvenant. E ora ta trabou di hues pa dikta un solushon. P’esei ta miho pa e pareha solushoná kualkier situashon entre nan mes. Di kon ta importante pa traha un konbenio di divorsio? Den kaso ku partido yega na akuerdo dus pa traha un konbenio e prosedura por bai hopi mas lihe i mas suave, paso ja e pareha a disidí kon nan ke divorsiá y asina nan ta evitá di keda prosede den korte sin keda kla paso nan no ta di akuerdo ku otro enkuanto nan pertinensianan.

Semper tin e posibilidat pa divorsia e forma tradishonal sin konbenio dor di hasi un petishon di divorsio serka un hues prome i despues sigi regla sobra asuntunan den korte of serka un notario. E forma di proseder sin konbenio por dura mas largu y por ta mas kostoso tambe. Pues ya bo sa; divorsio nunka no ta fasil, paso semper tin hopi emoshon i inseguridat. Ta p’esei ta bon pa partidonan sinta na mesa, papia y sigui papia ku otro te ora ku partidonan yega na un akuerdo pa repartishon di bienes i demas asuntunan ku otro, pafó di korte. Ora amor a kaba,mester regla asuntunan finansiero sin emoshon! Te otro siman ku Dios su poder I kòrda ku semper nos tei pa duna bo tur konseho!