Mi ta hende grandi, y mi tin un yu hòmber di 50 aña ta biba den mi kas huntu ku mi. E yu ta kue djop den konstrukshon , e no ta hasi nada. Mi kas ta su hotèl. E ta kome pòrnada i e no ta aportȧ ku nada! Kiko mi por hasi?

Na tur fiel lesadó di e kolumna aki bon siman i mi ta spera ku bosnan ta gosando di Kòrsou su dushi ambiente di Karnaval. Ban wak e pregunta di siman i kon por yega na solushon.

Pregunta: Mi ta hende grandi, y mi tin un yu hòmber di 50 aña ta biba den mi kas huntu ku mi. E yu ta kue djop den konstrukshon , e no ta hasi nada. Mi kas ta su hotèl. E ta kome pòrnada i e no ta aportȧ ku nada! Kiko mi por hasi?

E pregunta aki ta un realidat ku hopi hende ta pasando aden i tin biaha pa berguensa no ta buska un solushon, keriendo ku e problema lo solushoná di mes. Ta un senario típiko di nos komunidat i kustumbernan, pero esei no ta kita ku e doño di kas tin su derechi i debernan. Esun ku ta biba den kas di un hende, sea ku ta un famia yegá of no, tambe tin su deber i obligashonnan!.

Nos lei ta stipulá kiko ta propiedat. Esei ta derechí di un persona pa hasi uso di por ehèmpel un propiedat, artíkulo, sèn ets, manera e mes ke of haña ta bon. Propiedat di un hende  jama privé eigendom. Esei ta nifiká ku e esun ku ta doño ta esun ku tin derechí den e kaso aki.

E doño di e kas/propiedat ta fuerte den su posishon i derechinan den lei, paso lei ta stipulá ku e por hasi i deshasí manè e ke ku su propiedat, pero semper teniendo na kuenta ku e lei vigente di gobièrnu i otro leinan. E propietario di e kas no por hasi mal uso di e propiedat ku ta bai kontra di lei. Por ehèmpel, e doño no por krea ambiente di sushedat, kima sushi, e no por toka muzik duru hinter dia (esaki ta stipulá den Lei di Molèster o sea Hinderverordening). Aparte di esei, e no por kria galiña ni otro tipo di bestia sin ku e tin e outorisashonnan legal nesesario. E propietario tin derechi komo doño riba tur loke e tereno di e kas ta produsí. Por ehèmpel, si  tin palu di mango, lamunchi of trank’é di pampuna, papaya ets, nan ta di dje.

Den e kaso di e señora ta bon pa para ketu  na aspektonan di seguridat. Nos pais ta pasando den un racha di ladronisia, kiebro i aktonan violento. E señora en kestion mester tin un kompaño den kas.  E yu propablemente a nase den e kas i e ta kere ku e tin derechi di biba eiden. Pero si ta un yu mayor di edat, e señora no tin niun obligashon ni responsabelidat mas ku n’e.  Si e yu ke sigui biba den e kas, mester yega na un akuerdo pa e paga su mama hür. Si niun di e opshonnan aki no ta yuda, e señora por pidi asistensha legal di un abogado pa laga hasi un petishon ofisial pa laga un hues saka e yu for di kas. Si ta nesesario lo hasi esaki ku man duru.

Kòrda semper ku abo komo doño tin derechinan fundamental ku ta ankrá den lei. Bo por laga saka e yu for di kas, pero komo doño tur kos ta den bo man pa kosnan no yega asina leu. Tin instanshanan di Gobièrnu ku por yuda i bo por akudí serka un eksperto legal of abogado ku ta spesifiká kiko por hasi i pone bo den kontakto ku ekspertonan ku ta sigui desaroyonan di e kas i su doño.

 

Pues ya bo sa, no tene berguensa of skonde bo miedunan ora ku algu legalmente ta di bo i bo tin tur derechí riba dje. Ami tei semper pa yuda bo i duna bo e mihó konseho. Aki dos siman nos ta topa atrobe. Sigui manda tur bo preguntanan pa nos yuda bo.