Mi ke mi penshun awor ku mi a divorsia.

Un felís djaluna promé ku Pasku na tur mi fiel lesadónan. Nos a yega e siman kaminda Niño Hesus ta nase i mustra un biaha mas e mensahe di union i amor. Ban gosa uni, i pordoná, trata na lubidá i konbibí mas ku otro. Pero ata e tema ku mi ke trata awe:

Pregunta di siman:Bondia, señora Scheperboer, mi pregunta:Mi ta e promé kasá di mi èks-kasá. Despues di 10 aña nos matrimonio a tèrminá i nos no a haña yu. Mi èks tabatin un bon trabou den gobièrnu i e tin penhsun. Nos a kasa “binnen gemeenschap van goederen” (den komunidat di bienes). For di aña 2000 ora nos a divorsiá te awe,  nunka tabatin repartishon. Despues mi èks a kasa di nobo. Awor na 2016 el a fayesé, mi famia ta bló bisa mi buska mi derechi pa ku su penshun, kiko ta posibel?

Danki pa e pregunta, un situashon ku sa sosedé hopi aki na Kòrsou; promé ku kasamentu por regla hopi asuntu por ehèmpel kasamentu buitengemeenschap van goederen.  Pero Esei no a sosodé, anto despues di kasamentu ta den union di bienes bosnan ta kasá, e asina jama: ‘den komunidat di bienes’. Manera ta kasá den komunidat di bienes, despues di divorsio mester repartí e propiedatnan. Si e mener a kasa ku un otro persona, promé ku e persona aki heredá algu, mester repartí e propiedatnan ku e èks kasá. Tene na kuenta ku si tin kas i otro asuntu ku durante di e tempu ku señor tabata kasá, ku esei nan tambe mester parti mitar, mitar.

Den kaso di penshun, Korte di Hustisia den e arrest di “Boon van Loon” a stipulá ku e penshun ku a akumulá ta kai den ‘ ‘komunidat di bienes’ i ku mester parti. Den prinsipio mester parti tur kos mitar mitar si ta kasá den komunion di bienes esei kemen señora supuestamente e tin  derechi riba  mitar di e totalidat. Mester wak na unda e èks tin su penshun, i e instansha por informá señora tokante kuantu plaka tin di spar na penshun i kon e repartishon lo ta. Kòrda bai ku señora su ‘beschikking’ di divorsio. Si no ta bini klá semper ta bon pa konsultá ku un abogado ya bo sa eksáktamente kiko bo derechi ta.

Pues ya bo sa, e tema di kasamentu i divorsio ta unu hopi delikado ku konsekuenshanan profundo ku no ta fásil pa ‘reverse’ Nos ta topa dia 27 Desèmber ku Dios su poder. Pas Amor i Bendishon di nos tur pa bosnan tur!