Mi mester paga pa un trouwboek ku mi no mester?

Desèmber ta luna di kos bon, awaseru, Pasku i si… matrimonio! Shonnan bondia i bon siman. Laga nos habri siman ku otro tema ku semper tin su kosnan. Ban wak e pregunta i bo ta komprondé kiko mi kemen:

Geraldine, mi ta bai kasa ku mi amiga di 3 aña, mi a n’amorá di dje, mi ke hasi’é mi partner di bida i mama di mi futuro yunan. Kranshi a bisa mi ku mi tin gastu ku trouwboek, mi no ta komprondé dikon mi tin ku paga pa un trouwboek mi no a pidi nan pa un trouwboek, mi ke kasa manera lei ta bisa. señora Geraldine por klarami un ratu?

Danki pa e pregunta i sigur unu ku a pone mi smail un ratu; laga nos ban wak kiko lei ta stipulá riba matrimonio, trouwboek i akte:

Tur hende ku ke kasa mester deklará na otro ku nan ta tuma otro komo esposo(a) i ku nan ta kumpli ku tur nan debernan, ku lei ta mara na e matrimonio. E ora ei e ámtenar di kranshi ta deklará bosnan hòmber i muhé dus kasá di otro.

Mi a revisá lei i mi a haña un artíkulo ku yamá “bewijs van het bestaan van het huwelijk”. E artíkulo aki ta stipulá ku un matrimonio ku a tuma lugá aki na Kòrsou por wordu probá ku un huwelijksakte/akta matrimonial, anto e artíkulo ta sigui stipulá ku den kaso ku no tin huwelijksakte por proba esaki di otro manera. Pero e otro maneranan no ta papia di un trouwboek.

Ku otro palabra un trouwboek no tin un status ofisial, e ta nada mas ku un rekuerdo i ta algu ku ta duna e seremonia di kasamentu supstansha. E trouwboek, of familieboek ta wòrdu husá pa pone nòmber di esnan ku a kasa, nòmber di nan mama i tata, tambe nòmber di testigunan. E dokumento ku pa lei ku si ta ofisial ta e akte di matrimonio ku ta registrá na kranshi i ku pa semper bo por pidi unu, pero bo tin di paga pe tambe. Si un persona divorsiá e trouwboek no ta reflehá esei i atrobe kualke kambio hurídiko tuma lugá despues di matrimonio tur ta wòrdu registrá na kranshi por medio di un akte. Dus ora yiu nanse, ora morto kai i na ora di divorsio.

Den sala di korte e dokumentu ku semper un hues ta rekonos’é ta un akta, pa esei ta e dokumentu ku ta bin for di un instansha instituí pa lei.

Pues ya bo sa, matrimonio ta algu bunita, serio i pa bida largu. E ta trese kambionan profundo den bo posishon hurídiko, i un matrimonio ta kosta sèn!

Un trouwboek no tin un status ofisial pero e ta un bunita rekuerdo di e enlase matrimonial entre dos persona. Anto promé ku mi sera kòrda esaki. Mi konseho personal i profeshonal ta bo tur esnan ku awe ta wak kurason den wowo di bo future pareha i despues bo ke pidi kos malu p’é!

Promé ku bo formalisá bo bida buska konseho hurídiko i un abogado semper ta e miho amigu ku bo por konta riba dje!