Mi ta biba ku un hòmber kasa, ki ta mi derecho?

E siman aki nos ta ban amplia riba e “konkubina” e muhe ku forma bida ku un homber kasa. Ta un fenomeno konosi den nos komunidat. Pero sa tin disputanan grandi ora di morto I semper e konkubina a sali perdi. Ban analisa kiko lei ta stipula I ki derechi e konkubina tin.

Prome ku 1 januari 2012 no tabatin niun areglo pa e persona ku ta biba ku un hende homber kasa.

For di 1 januari 2012  a implementa un lei, ku ta duna  e konkubina derechi. E tambe por hereda for di e homber despues ku e muri.

Den e  lei nobo tin un artikulo ku ta di karakter obligatorio. Esei kemen ku no tin mag di kita for di e lei. Den nos BWC “Burgelijk Wetboek van Curacao”,  nos ta mira kon e lei ta hinka den otro, ku ta duna e konkubina derechi igual ku e kasa dje homber.

E lei ta bisa  lo siguiente: “si e ‘erflater'(e homber kasa) prome ku su fayesimento a biba dies anja of mas ku e konkubina, komo sifuera kasa, e ora ei hues por disidi  si e ta hanja hustu  ku e konkubina por hasi uso di e otro artikulonan  den e afdeling aki. Si  e homber a laga un kasa atras e ora ei  e parti aki di lei, ta konta meskos  pa e konkubina.

A base for di e aritikulo aki 4:30b BWC; e  konkubina mester kumpli ku e 3 eksigensha nan aki:

1.  E defuntu (e homber) mester a biba 10 anja of mas ku e konkubina .
2.  Nan dos mester a biba komo si fuera ta kasa nan ta.

** Mester determina kon leu nan a biba manera ta kasa nan ta.

**E relashon mester tabata di indole duradero.

**E homber I konkubina mester  tabatin interes mutuo pa otro. (ehempel: nan ta kushina, komparti gastunan di kas, I kuida otro.

** Den e kuadro di konbibensha mutuo, mester tin prueba ku e dos personanan a biba na e mesun adres, anto tur dos mester a kumpli ku gastunan di kas.

3.  Si hues ta hanja ku ta hustu, e ta determina kon leu e konkubina ta hanja e mesun derechinan ku kasa di e homber. Den e kuadro aki, hues lo evalua prueba I sirkunstanshanan di e situashon. Korda si, ku ta un arikulo nobo. Den prinsipio wes ta hanja hopi espasio kon e ta aplika e lei.

Pues, esaki ta djis un parti  di e derechinan di  e konkubina. Semper tin espasio pa kontesta tur pregunta adishonal. Korda temanan di lei sa ta komplika , pero mi tei semper pa yuda bo.