Mi ta kasá ku un Ulandes Oropeo I nan a deportá mi, ki derechi mi tin?

Nos lei “Landsverordening Toelating en Uitzetting (LTU)”, ta regla kon un persona por keda legal na Korsou i si un persona keda ilegal riba nos isla kiko e konsekuenshanan por ta p’e. Pa un persona keda legal riba nos isla, e mester hasi un petishon di trabou i estadia na e instanshanan konserní. Un persona ku ta kasá ku un Ulandes mester apliká pa pèrmit di estadia so.

E solo hecho ku un persona ta kasá ku un Ulandes no ta dune e derechi di keda na Korsou outomátikamente. E mester hasi e trámitenan pa por regla su estadiaaki.Si akaso autoridat pone man riba un persona ilegal, (esnan ku a drenta Korsou i no a sali mas) nan tin e poder di ekspulsá (saka) e persona aki for di Korsou, pero e ekpulshon aki no ta bai asina sina. Autoridat mester duna e persona aki un “beschikking” esei kemen mester dun’e e motibunan por eskrito dikon ta sak’é for di Korsou.

E asina yama “dekreto” mester kontené a lo menos e siguiente puntonan:

Datos di e persona:

• E lei a base di su ekspulshon.
• E motibu dikon ta ekspuls’é.
• E tempu i fecha ku lo sak’e for di pais.
• E sanshon ku e lo haña ku ta 3 aña.

I mas importante su derechi, si a kaso e no ta di akuerdo ku e “beschikking” aki pa e haña tempu pa bai Korte of hasi un apelashon na minister di Hustisia.

E tempu pa bai Korte of hasi un apelashon ta dinter di 6 siman, si 6 siman pasa anto e persona no hasi nada, e ora ei e “Beschikking” ta haña forsa di lei. Ku otro palabra e sanshon pa saka e persona ta bira formal. Esei kemen ku por ehekut’é.

Pues, si, ekpulsa bo inhustamente I 6 siman no a pasa ainda, bo tin e derechi di bai Korte di Hustisia of hasi un apelashon na Minister di Hustisia. Si a kaso bo ta den eksterior kaba bo por bai un bufete di abogado pa yuda bo.

Kòrda, nos tei semper pa kontesta bo preguntanan via mail, telefòn of simplemente trahando un sita. Te otro siman ku Dios ke!