Mi ta un muhé Venezolana i mi tin 10 aña bibá na Korsou legal. Mi a lesa den korant ku no mester hasi èksamen mas na Ulandes pa pasport. Ta bèrdat e kos ei ta?

Bon siman na tur mi fiel lesadónan. Un siman bendishoná ku hopi sabiduria I perseveransha! Si kosnan no ta bai mané bo ke hinka rudia resa. Portanan ta habri pa esun ku ta hustu….

Ban wak e pregunta di siman:

Pregunta: bon dia señora ami ta un muhé Venezolana i mi tin 10 aña bibá na Korsou legal. Mi a lesa den korant ku no mester hasi èksamen mas na Ulandes pa pasport. Ta bèrdat e kos ei ta?

Danki pa e pregunta, i sigur sigur un tema ku ta biba hopi bou estranheronan ku ke naturalisá despues di 10-10-10. M’a yega di skibi over di e tema aki pero no over di e èksamen na Ulandes.

Promé ku 10-10-10, tur interesadó pa naturalisashon ku no ta e proseso di “Optie” mestera hasi e asina yama “inburgeringstoets”. E toets aki por a hasié na papiamentu.

Den e tempu ei Kòrsou tabata Antia Ulandes. Esei kemen  ku pa “naturalisatie”, Reino a bai di akuerdo pa laga nos gobernashon mes kanalisá tur aspekto di naturalisashon. Esei ta nifika e preparashonnan pa e trayekto kristalisá.Tur esaki nan basá riba e asina yamá Rijkswet Nederlanderschap. Dunamentu di pasport ta algu di Reino i no di individual di kada isla ku ta pertenesé na reino. Despues di 10-10-10, ora ku Kòrsou a bira autónomo den Reino, Reino a pasa sakamentu di pasport pa Gobernadó i no Gezaghebber mas pasó  pasport a bira un asunto di Reino. Esei kemen ku mester pasa e èksamen na Ulandes. Loke korant a publiká ta un proposishon ku a hasi na Reino.

Kòrda Lei di Reino -esta Rijkswet- ta e lei di mas haltu i semper e lei aki ta prevalesé riba tur otro lei. Dus -pa kontestá bo pregunta te ku awor aki un persona ku ke naturalisá mester pasa of hasi éksamen na Hulandes.

Mi ta kontentu ku bo a hanja mas informashon riba loke ta un proposishon. Un proposishon no ta nada ahinda tanten e no wordu aprobá i apliká. Den e kaso spesífiko aki ta Reino Ulandes ta bai tin e último palabra. Bendishon Rumannan te otro siman.