Mi tin un amiga di hopi tempu kaba, nos tabata hasi tur kos huntu i nos sa tur sekreto di otro. Pa un kuestion di negoshi nos amistad a kibra. Awor e ta kana papia malu di mi ku tur hende ku ami ta hasi negoshi ku n’é kiko mi por hasi pa e stòp?

Bon siman na tur  mi fiel lesadónan. Mi ta spera ku bosnan fin di siman tabata kargáku sosiego, positivismo i trankilidat. Kòrda bo kurpa ta un tèmpel di Dios i trankilidat físiko ta krusial pa kada un di nos. Ban wak e tema di e siman aki.

Pregunta: mi tin un amiga di hopi tempu kaba, nos tabata hasi tur kos huntu i nos sa tur sekreto di otro. Pa un kuestion di negoshi nos amistad a kibra. Awor e ta kana papia malu di mi ku tur hende ku ami ta hasi negoshi ku n’é kiko mi por hasi pa e stòp?

Danki pa e pregunta e asuntu aki ta un fenómeno ku ta lantando kabes na Kòrsou i e no ta algu bunita. Laga nos ban wak kiko e fenómeno aki ta i kiko por hasi. Den nos tèrmino legal e fenómeno aki yama Kalumnia of difamashon. Tur dos ta kodifiká den nos buki di strafrecht. “Laster” Kalumnia ta skibi of bisa algu ku no ta bèrdat di un hende kaminda e otro ta wòrdu perhudiká den su honor i bon nòmber. Esun ku ta laga sa yen kos, sa ku e lokual nan e ta bisa no ta e bèrdat. Ora nos ta papia di laster ta importante ku mester proba sí, ku persona tabata sa ku ta mentira e la papia. “Smaad” ta kasi meskos ku laster pero e diferensha ta, ku den un kaso di smaad e lokual a papia ta e bèrdat, pero ku e intenshon pa hasi daño na honor i bon nòmber di un persona.

Dus “Laster” ta hopi mas malu ku “smaad “ pasó loke ta papia di e otro persona ta kompletamente un mentira. E kastigu ku un hende por haña pa laster ta máksimo 3 aña pasó e ta kategoris’é komo un delito/krimen fuerte i solamente por persiguí e persona perhudiká, si  duna un keho na autoridat. Tambe esun perhudiká por pidi daño i perwisio. Den kaso di smaad e kastigu ku un persona por haña no ta haltu, e no ta mas tantu ku 6 luna i e persona perhudiká por pidi daño i perhuisio. Den kaso di laster mester proba ku e persona ku ta wòrdu akusá di laster tabata sa, ku e no tabata papia e bèrdat.

Mester verífiká semper bon ta den ki forma bo nòmber ta wordu usá, sea ta un mentira intenshonal riba bo pa daña bo imahen, bon nòmber of honor òf ta trata di e berdat pero pa hasi daño na bo persona.

Si akaso bo ta akusá di “laster” of “smaad” semper ta bon pa buska asistensia hurídiko serka un abogado. Asina e por konsehá bo tokante bo posishon hurídiko i bou di sirkumstansha kiko bo mester hasi, manera deklará, keda ketu, of kiko si deklará. Pues ya bo sa, si bo no tin nada di bisa mihó keda ketu pasó bo por haña bo den hopi problema sin ta na nodi.

Kòrda semper mi tei pa duna bo e mihó konsehonan tur kos bon i te otro siman ku poder di Dios!