Mi tin un yu ku mi partner anto mi partner ta kasá ahinda, kiko mi por hasi pa mi yu haña mi fam?

Lagami kuminsá na deseá kada un di bosnan un felís fin di siman. Awe un tema delikado ku ta bati na nos tur su porta. Bo por bira kara hunga kèns, of no konfronté. Pero un dia bo ta haña bo ku un situashon ku bo mester konsultá un eksperto legal pa yuda bo. E pregunta aki a drenta serka mi….

Pregunta: mi tin un yu ku mi partner anto mi partner ta kasá ainda, kiko mi por hasi pa mi yu haña mi fam?

Un hende hòmber ku bira tata for di matrimonio tin e derecho di rekonosé su yu, pero otro ta e kaso si un hende muhé ku ta kasá, I no ta bibá ku su kasá i el a a haña yu ku un otro hòmber

***E yu ku nanse aki ta haña fam di e kasa di e hende muhé, paso e ta wordu konsiderá nanse bou di martimonio. E tata biológiko di e yu aki en prinsipio no por hasi nada! Den nos Burgelijkewet boek (BWC) tin e lei asina yamá “ontkenning van Vaderschap”. E lei aki ta stipulá ku ontkenning van vaderschap(nenga di rekonosé bo yu) por wordu hasi dor di 1) e mama of tata di e yu 2) of e yu mes

***”Ontkenning” no por wordu hasi si: 1) E kasá (hòmber) promé ku kasamentu tabata na altura di e embaraso 2) Si e kasá (hòmber) a bai di akuerdo ku e akto di embaraso di e muhé

***Pa e yu por haña fam di su tata biológiko, e mama of e tata (esun ku e ta kasa ku e mama) mester hinka un petishon di ontkenning E mama mester hasi esaki denter di un aña despues ku e yu a nanse i e tata por hasi esaki denter di un aña despues ku e ta na altura ku e yu a nanse. Si a kaso e yu ta menor di edat i su mama of tata no por hasi e ontkenning pa kualke motibu, Korte por nombra un “bijzonder curator” pa hasi e petishon pa e mucha.

***Ta importante pa e Mama tene bon na kuenta ku e so por hasi ontkenning di vaderschap (nenga paternidat)denter di un aña despues ku e yu a nanse, dus promé ku e yu hasi 1 aña. Despues di esei e no por hasi nada mas! E kasá di e señora ku no ta tata biológiko di e yu por hasi ontkenning den un aña di tempu for di e momentu ku e la sa ku e no ta e tata biológiko di e yu.

Manera mi a bisa kaba, e tema aki ta unu ku ta lansa hopi pregunta i por krea konfushon. Sea konsiente buska derecho di bo yu I buska konseho serka un hurista of un hende spesialisá den e área aki di lei. Danki pa e reakshonnan, otro siman mi tei atrobe sin falta!