Minister di SOAW ke introdusi un maneho nobo pa permit di trabou.

Durante siman pasa, mi a hanja diferente reakshon i pregunta riba un publikashon den un korant matutino di Korsou, kaminda Minister di SOAW  ke introdusi un maneho nobo pa permit di trabou. Segun e reakshon ta drenta mí a disidi di splika kiko ta kontenido di:

1) e maneho nobo,

2) e maneho ku tin aktualmente,

3) konklushon riba e maneho nobo ku supuestamente  mester drenta na vigor.

1) E dekreto nobo ta ensera ku durante un anja lo stop di duna permit di trabou nobo na un lista grandi di okupashonnan riba e tereno laboral. Ta trata di okupashon manera e dekreto mes ta bisa “ongeschoolde en laaggeschoolde beroepen” (tira un bista riba e lista di trabounan) Despues di un anja ku a introdusi e dekreto aki, Minister lo evalua e efektonan di e dekreto. E dekreto aki ta pa dunado di trabou (werkgevers).

Tambe e dekreto ta stipula ku pa motibunan ekonomiko Minister por evuala ku den un situashon partikular e lo NO duna permit di trabou si ta trata di un funshon ku no ta riba su lista i tambe pa e mesun motibu di ekonomia Minister SI por outorisa permit di trabou den un kaso partikular na un funshon ku ta riba e lista menshona.

2) Aktualmente tin un maneho pa e dunado di trabou kaminda ta stipula ku e tin ku hasi un pre-aplikashon na SOAW serka na e asina yama “banko di vakatura” prome ku introdusi un permit di trabou. E pre-aplikashon aki ta konta tantu pa e werkgever ku ta hasi petishon pa prome biaha i pa werkgever ku ta renobando un petishon di trabou.E pre-aplikashon ta keda en prinsipio 5 siman pa evalua na banko di vakatura pa asina por kontrola si en berdat no tin hende lokal pa hasi e trabou. Si akaso tin hende lokal e donjo di trabo lo hanja un karta pa pone na altura ku e mester duna e persona aki un chens prome. Naturalmente tur donjo di trabou ta tene un kombersashon ku e persona pa wak si e persona i e donjo kisasm por traha ku otro. E maneho aktual aki tin hopi problema ku n’e.

Na prome luga pre-aplikashon ta tarda mas ku sinku siman; ora un donjo di trabow ta hasi renobashon riba e formulario. E ta obliga di bisa ku ta un vakatura nobo e ta habri. Si e kantidad di persona lokal ku banko ta ofrese ta hopi abou, por ultimo, e datosnan no ta vigente mas,  i no por drenta den kontakto ku e persona. Na final di kuenta nos por konklui ku e kantidad di datos ku e asina yama “banko di vakatura” tin ta hopi limita.

3) Analisando e maneho nobo, Minister ta basa su mes riba

1) un ekonomia no agradabel

2) riba e kantidat di desempleadonan ku tin aktualmente

3) preferensia di dunado di trabou pa ku esranhero

4) E estranhero ta aksepta entrada mas abou, I hopi ta produsi mas tantu, nan ta mas fleksibel, I nan ta traha den sistuashonnan menos agradabel. Pa kolmo nan no konose leinan vigente, i yen otro asuntunan mas.

Remarkabel ta ku Minister su pensamentunan no ta basa riba hechos. Den e dekreto  Minister mes ta bisa ku riba tereno laboral tin hopi manipulashon i ku e sirkumstansianan no ta saludabel. Nos Inspekshon Laboral no ta funshonando. No ta nada stranjo ku nos mes hendenan no ke traha bou di kondishonnan asina aki.

Komo abogado ku a kombersa  ku personanan versa riba e tereno di labor, i ku a hiba kaso di “leshon den area di trabou korte, mi sa ku ta un hecho ku hopi di nos hendenan ta traha den situashonnan no agradabel i hasta bou di menasa. Nos mester drecha e situashon pa TUR hende; esei ke men di ku nos leinan antikua tin mester yega nivel modern a base di e proseso parlamentario sigur si nos ta respeta I uni nos mes  na nivel moderno di e tratadonan di ILO (= International Labor Organisation). Tin hopi problema riba area di trabou. No tin kontrol, tur dia tin hende herida fisikamente i mentalmente. Mientras drechamentu di nos leinan laboral no ta un prioridat den  e dekreto nobo aki. Gobiernu ta bai hinka nos hendenan lokal den un situashon di labor NO agradabel, NO optimal, Ni produktivo. Esei ke men, Minister a disidi ku donjo di trabou no tin mag di pidi permit, pa asina forsa nos hende bai traha, pero e situashon di trabou, si nos titular di SOAW no a drecha!!!

Nos pueblo merese un maneho sigur I inos hendenan mester bini na prome luga, e maneho mane e ta, lo no produsi fruta pa nos ekonomia I desaroyo laboral.

Pues ya abo sa, mintras nos leinan laboral no drecha na nivel international Minister Ruthmilda Cicilia Larmonie krea mas ambiente di desempleo. Nos hendenan merese traha den un ambiente sano i sin manipulashon. No pusha nan den un ambiente laboral ku no ta saludabel. E no ta konta pa trahadonan lokal ni migrantenan ku ta bin buska un miho porvenir riba e baranka dushi aki.

Asina un hende drenta den servisio, lei di labor ta konta pe tambe.Un gobierno tin e deber di solushona e tipo di problemanan aki den bon konsulta ku organisashonnan di donjonan di trabou i di empleadonan. Anto sin lubida di konsulta ku ekspertonan laboral independiente, den ARBO I den Gobiernu mes.