Paga impuesto pa hende morto kon por ta?

Na tur mi fiel lesadónan Bon Siman! Bendishon I tur kos bon! Ban habri siman ku positivismo I amor! Manera semper tin preguntanan fèrfelu ku nos tei kla pa yuda bo….Ban wak e pregunta di siman!

Sra. abogado Scheperboer, bondia i bon siman. E último temanan di kasamentu ta hopi bon, kosnan di bida real. Ami tin un pregunta, mi tambe tin un problema ku belasting, mi kasá a fayesé anto mi a resibi karta di belasting pa paga algu manera sucessie/susheshon? Señora abogado mi no ta komprondé  muchu bon, señora por bisa mi kiko pa hasi? Mester paga belasting pa hende morto?

Danki pa e pregunta i laga nos ban wak kiko ta successierecht of  impuesto di Herensia! manera ta yam’é awendia. Na momentu ku persona fayesé anto tin heredero -den e kaso aki señora ta e heredero di señora su kasá- e ora ei mester paga belasting riba tur lokual ku señora a heredá. Mayoria di bes belasting (ofisina di impuesto) ta manda kobra despues di un temporada ku e persona a fayesé. E por ta entre 4-6 luna ku nan ta manda kobra.

Normalmente mester traha un lista di tur e pertinensianan i debenan di e persona ku a fayesé. E balor di e pertenenshanan ta wordu stipulá na e momentu ku e persona a fayesé. Ku otro palabra no bai bèk na e balor original, dus na ora di kompra of e balor despues di fayesimento. Por ehèmpel un hende ta fayesé anto un yu ta hasi asina mal uso di su outo ku su balor a baha. E ora ei e balor ku ta konta ta esun na momentu di fayesimento.

Riba e balor total ku señora ta heredá mester paga erfbelasting (impuesto di Herensia). Tambe tin posibilidad pa pidi e asina yamá vrijstelling (eksonerashon di impuesto). Tambe ta importante pa sa e kantidad di belasting ( impuesto)ku mester wordu pagá ta dependé di sierto faktornan por ehèmpel bo relashon pa ku fayesido, si ta kasá of yu of un otro hende ku no ta famia.

Esnan ku no ta famia ta paga mas tantu belasting. Mas grandi e herensia mas belasting tin di paga. Ofisina di belasting por duna señora informashon adishonal. Tambe ta bon pa tuma kontakto ku un abogado i laga e abogado kanalisá e ruta di kana pa señora. Pues ja bo sa, kasamentu ta te na ora Dios separabo i esei por dura largu, wak pa bo ta bon informá asina bo por evitá problema i prepará bo mes pa sorpresanan di bida.

Un bon konseho semper ta na lugá. Tum’é, pensa riba dje i pone den akshon konkreto!