Poko dia mi a lesa ku un abogado a desisti foi den un kaso di su kliente, kiko e kos ei kemen? Y kiko e por nifika pa e kliente?

Pregunta: Geraldine bondia mi gusta lesa bo kolumna e ta hopi informativo, poko dia mi a lesa ku un abogado ta desisti foi den un kaso di su kliente kiko e kos ei kemen? Y kiko e por nifika pa e kliente?

Danki pa e pregunta i tur dia di nobo mi ta purba di informa i konsientisa tur hende.

“Desisteren” ta nifika ku un abogado ta laga un kaso para; ku otro palabra e no ta respresenta su kliente mas, e ta stop ku e kaso i e kliente mester buska un otro abogado pa represent’e.

Den e lei di komportashon di abogado, ta stipula ku ta e abogado tin e manejo di un kaso i ku un abogado no tin mag di hasi nigun handeling kontra di boluntad di su kliente. Tur kos ku pasa ku e kaso ta bou di responsabilidad di e abogado. Un kliente no tin mag di bisa e abogado pa hasi algu ku ta kontra e reglanan di honor i komportashon di un abogado i nada kontra di moral.

Si akaso entre e abogado i su kliente tin diferensha di opinion tokante e manera kon e kaso tin di wordu hiba i nan dos no por yega na un akuerdo, e ora ei e abogado tin di desisti for di e kaso.

E abogado no tin mag di desisti na un momentu no oportuno pa e kliente, solamente si e abogado ta hañ’e den un situashon ku e no por hasi nada otro. E abogado ku desisti fo’i un kaso, por keda responsabel si den un situashon ku ta eksigi di dje pa e hasi tur loke ta posibel pa evita ku su kliente por hanja mas daño paso ela desisti.

E abogado bou di ningun sirkunstansha tin mag di desisti paso e kliente no a pagele. E kos di mas importante ta e relashon entre e abogado i e kliente; e mester ta a base di konfiansa i respet mutuo.

Den situashon ku abogado a desisti, lei ta duna e kliente tempu pa buska otro abogado i lei ta duna e abogado tambe tempu pa e por studia e kaso. Esei kemen ku e kaso ta bai dura un tiki mas largu ku a wordu stipula pero e kaso lo yega su fin manera tur kos.

Pues ya bo sa, abogado tin su reglanan di honor i moral ku e mester kumpli kun’e, i e no ta hasi nada pafo di esei, paso e ta bai haña su mes forsa pa desisti for di e kaso.