SKOL TA PERHUDIKÁ STUDIANTE

Bon siman na tur lesadónan di e kolumna aki. Mi tin sigur ku vários mayor tabata felís ku resultado di skol di nan yunan i ku nan ta prepará pa aña eskolar nobo. Tin mayor ku ta desapuntá pero tog nan ta motivá nan yunan i enkurashanan pa nan ekselá den nan karera edukativo. Esaki ta e pregunta ku nos a haña e siman aki:

“Ami ta un studiante i mi tabata studia na un skol privá di habla íngles. Pa motibunan personal mi tata no por a paga e skol ei p’ami mas. Mi a kita for di e skol pa bai otro skol, i awor ku mi ke sigui studia un karera, e skol aterior NO ke duna mi un un balorashon di diploma. E úniko manera pa e skol duna mi ta ku mi tata mester paga promé. Mi pregunta ta: e skol ei tin mag di stroba mi den mi estudio?

Danki pa e pregunta i sigur unu hopi interesante. Na prome luga laga mi splika kiko ta un “verklaring tot diplomawaardering”(deklarashon di balorashon di diploma); e deklarashon aki ta unu ku ta deklará kua ta e nivel di mas haltu ku bo a logra of den e kaso aki e nivel ku bo a logra na íngles kompará ku e nivel Hulandes asina por sigui studia. Ku otro palabra ki nivel bo tin ora b’a kaba un klas den un skol. Tambe por pidi un verklaring (deklarashon) asina ki pa otro motibu manera pa sa bo kapasidat si akaso,bo ke bira maestro di skol, of pa haña trabou.

Un skol in prinsipio no mag di perhudiká niun studiante, pasó esei ta kontra di tur derechi internashonal i prinsipalmente di muchanan entre 0-18 aña. Pero awor si e skol ta mustra mala fé paso tin un kuenta habrí, purba na yega na un areglo. Semper bo por buska asistensia hurídiko, pero tambe nos Ministerio di Enseñansa por yuda.

Bo por aserká e ministerio aki i nan por yuda bo yega na un “verklaring tot diplomawaardering”. Tin algun eksigensha ku e petishon mester kumpli kuné, por ehèmpel, mester skibi un karta ku bo personalia  (datosnan personal) i splikando e motibu di e verklaring (deklarashon) aki. Kòrda ku tin un gastu mará na e petishon. Den di 6 siman bo ta haña bo verklaring(deklarashon). Hasi bo bèst manda bo karta bo mes i no laga niun hende of instansia stroba ku bo metanan pa yega bo potenshal máksimo.

Pues ya, bo sa tin diferente manera pa jega Roma, importante ta buska pa bo sa, sigui informá bo mes i NO laga nada stroba bo. Na tur estudiante ku a slag pa middelbare school i esnan ku tèrminá skol sekundario i na esnan ku a tèrminá Universidat un pabien. Na nos tatanan Pabien di ayera; sin bosnan nos yunan no ta kompleto.