TOKO DEN TOKO? NO HORTA FOR DI BO DOÑO DI TRABOU!

Bon siman i bendishon na tur mi fiel lesadónan. Un biaha mas danki pa e reakshon i pregunta nan ku mi ta haña tur siman pa duna abo un bon konseho hurídiko. Maske kosnan no ta bai manera boke, kòrdabo tin un bos i semper tin mannan habrí kla pa yudabo. Ban wak e tema di e siman aki. E frase ‘Toko den Toko’ a bira masha konosi. E ta aplikabel riba eskala grandi i chikí. Esaki ta e pregunta ku a drenta serkanos:

Mi tin un kapsalon i mi tin un mucha muhé ta traha pa mi. Mi no ta riku, ni mi no ta pober; mi ta drai mi negoshi di tal forma ku mi por paga salario di mi trahadó, belasting i kubri mi mes gastunan; mi ta agradesido pa esei.

Ma haña  sa ku mi pelukera ta hòrta mi produktonan i un kliente dimi a mustra mi riba app kon e ta invit’é pa bin hasi kabei na su kas riba su dia liber. Kiko mi por hasi legalmente paso e kos aki ta un abusu di konfiansa?

Danki pa e pregunta i en prinsipio legalmente señora por hasi hopi kos, pero laganos ban wak. For di señora su dilema mi ta mira dos pregunta unu ta toka ladronisia di producto i e otro ta ken tin derechi riba e kliente.

Kiko ta ladronisia?: Ladronisia ta ora un persona kue un “kos material” den e kaso aki produkto.  E material aki ta pertenesé na un otro i el a kue ku e intenshon pa bira doño di dje i keda kune sin ku e doño a duna su outorisashon.  Esaki ta ladronisia!  Den e kaso di ladronisia mester hasi un aangifte (keho) na polis p’ asina Ministerio Públiko investigá e kaso. Kòrda duna un bon deskripshon kiko presis e trahadó a hòrta kisas bo por haña bo produktonan bèk. Si durante di e proseso den korte Hues a haña prueba di e ladronisia, e persona ta haña un kastigu.

Un di dos opshon: komo ta trata di un trahadó señora por dun’é “ontslag op staande voet”. Esei ta enserá ku e trahadó su kontrakt ta wòrdu terminá inmediatemente i no mester tene kuenta ku “opzegginsgtermijn”, ku ta e periodo legal ku lei ta stipulá pa kaba e relashon di trabou. E persona ta pèrdè su trabou i  su entrada i e ta kore riesgo di pèrdè   dianan di fakansi  i cessantia tambe. Pa un retiru inmedeato no mester pidi pèrmit na outoridat  en kestion.Tambe E doño di trabou por dun’é un atvertensha por eskrito i por sanshoné ku un schorsing.

Di ken e klientenan ta?  Un dicho na ulandes ta bisa“ De Klant is Koning. Hurídikamente ta e kliente ta disidí unda i serka ken e ta bai pa hasi su kabei. Den e kaso aki ní abo komo doño ni e trahadó no por determiná na unda e kliente mester bai pa hasi su kabei. Jurisprudentia (wes a determiná den pasado ku e kliente ta disidí unda e ta bai. E kliente no ta di niun hende. Den e aspekto aki mester tene kuenta ku “concurrentiebeding” o sea ku niun hende no ta doño di e kliente!

Pues ya bosa, bo trabou ta algu sagrado. Di otrobanda, bo no por ta trahando pa un negoshi, ganabo salario i bo mes ta hasi negoshi den negoshi di bo doño di trabou. “Toko den Toko” ta kontra di tur norma i valor i e konsekuensha por ta desastroso pa bo. Te otro siman ku Dios k’e!