Últimamente a sali den korant e asuntu di nòmber di un partido ku a registrá i ku no mag di use mas. Mi ke sa kiko ta e asuntu presís.

Na tur fiel lesadó di e segmento aki bon siman! Bendishon pa bosnan tur I semper nos ta kla pa yuda! Ban wak e tema di siman ta algu sumamente imporante pa pone atenshon n’e.

Últimamente a sali den korant e asuntu di nòmber di un partido ku a registrá i ku no mag di use mas. Mi ke sa kiko ta e asuntu presís.

Na promé luga danki pa e pregunta i sigur unu hopi interesante pa nos atendé asina trata di trese klaridad pa nos hendenan. Laga nos ban wak kiko nos ta papiando di dje i kiko e esensia ta. Na promé luga nos tin di hasi un distinshon entre “Handelsnaam” i “Merkrecht”.

Pa partido por funshoná e mester haña bida, i e bida ei ta kuminsá serka un notario i asina por inskribi’é den Kamer van Koophandel. Promé ku notario kuminsá ku e statutonan e mester di tres nòmber pa asina ora yega na KvK por verifiká ku e nòmber no ta ekstiti asina registra bou di dicho nomber. E por ta kualkier nomber. E partido asina ei tin su nomber ku e ta usa, na e momentu ku e partido no ta move mas den nos rechtsverkeer e ta keda ku e nomber. Kvk por pidi minister di Hustisia pa hasi e kompania inaktivo. Si a kaso e otro partido ke usa e nòmber ei mester pidi e doño nan promé si nan por usa  e nòmber. E doñonan por hasi esaki por medio di un “vrijwaringsbrief”.

Merknaam, ta ora un partido/kompania tin un logo of un seña e por laga e seña ei wòrdu registrá. Ora un kompania registá un seña, niun hende no tin mag di usa e seña sin e doñonan su autorisashon. Registro ta tuma lugá na BIP, Bureau Intelectuele Eigendommen. Registro di marka, seña, logo ta pa protehá e interes di e doño asina otronan por benifisiá di e seña. Esaki ta un derechi absoluto, esei kemen ku e seña ta bo propiedat, bo por hasi kiko bo ke ku n’é, i niun hende no por usa bo siña sin bo autorisashon. Si usa e seña sin autorisashon mester paga un but hopi haltu pa kada dia ku a usa e seña.

Kiko e situashon presís ta den e kaso partikular ku a sali den korant mi no sa, pero klaramente tin un problema kaminda doñonan pa pidi pa stòp di usa nan seña of nòmber.

Ta masha interesante pa sa kiko un hues lo bisa tokante di e kestion aki. Tambe nos tin e asina yama Otrooirecht, esaki ta pa un deskubrimentu ku un persona a bini kune i ku ta nobo i úniko riba mundu, por ehèmpel un buki, un produkto, ets. E derechi aki ta otorgá pa medio di un patènt Internashonal na e persona dor di Reino Ulandes, i ta wordu publiká den e “ Official Journal” den e Europees Octrooibureau.

Ku e derechi di Octrooi aki e persona tin e derechi absoluto pa e so komersialisá su produkto ku ela deskubri i e so mag benifesia fo’i dje. E derechi di octrooi ta bálido pa un temporada di 20 aña, esei kemen esun ku tin’e mester zorg pa komersialisa su produkto mas tantu posibel. Tambe por hasi petishon di Octrooi aki na Kòrsou.

Pues ya bo sa, si bo tin un logo, ku abo a designá of un idea úniko ta rekomendabel pa bo laga registré, asina evitá ku otro hende por “broma ku bo plumanan.” Semper buska yudansa serka un abogado.

Otro siman nos tei ku mas solushon I konseho pa prekupashonnan ku bo tin.