Violensha i su konsekuenshanan legal

Violensha i su konsekuenshanan legal!

Bon siman pa bosnan tur. Si, awor nos ta yegando e fase final di e periodo di ekspreshon di alegria I kultura pero tin kosnan serio ku nos No por keda sin evaluá. Un di nan ta violensha. Violensha por tin reperkushonnan serio pa hinter un komunidat. E ta reflehá di un forma negativo i nos tur mester karga ku e konsekuenshanan. Nos konosé violensha verbal, mental i físiko entre otro i tambe violensha kontra di mucha, na trabou, kontra di mayornan, na kas, ets. Kada un di e tipo di violensha nan aki por tin reperkushonnan serio tantu pa e víktima, e agresori tur hende ku ta rondonánan.

Den dékada 90 Wes mr. Bob Wit i Wes mr. Ludo Goossens a ekspresá den diskursonan ofisial ku kada komunidat ta haña e gobièrnu i nivel di kriminalidat ku e meresé! Awe nos ta na 2017 i violensha i agreshon a yega nivelnan desproporshonal.

Den teksto di Lei kiko ta violensha?

Violensha ta un forsa ku ta wòrdu usa kontra di un hende of un kos; e ta enserá un akshon premeditá di un of mas persona ku òf sin arma of otro artefaktonan. Banda di esei tin violensha ku maltrato, asesinato. Violensha ku maltrato ta enserá ora hasi daño den forma di herida of doló of kualke otro di daño na kurpa di un persona. Awendia ta masha normal ku via di medionan lokal i internashonal nos ta mira violensha físiko di siudadanonan kontra di otro, pero esun ku ta resaltá ta di representantenan di pueblo ku ta ataká otro públikamente; o sea den reunionnan públiko.

Na paisnan manera Afrika, Hapón, Venezuela, Italia, i India entre otro, nos a mira kon agreshon a resultá den hasta morto. Pero djís serka di kas, den apénas dos siman ku Gabinete a kai agreshonnan verbal a skeiru den Parlamentu i tur hende a mira kon el a akumulá den violensha físiko. Den fin di siman un hóben di apénas 17 aña pa akto di violensha a pèrdè subida. Dianan hopi skur pa Kòrsou i su suidadanonan kaminda e pueblo a keda den estado di shòk!

Ki diferensha di kastigu tin pa un representante di pueblo versus un siudadano?

Lei ta midi ku un midi? Hamás i nunka lei por permití su mes midi ku dos midí, ta pesi “Vrouwe Justitia”(Símbolo femenino di hustisia) su wowonan ta tapá. Esei kemen bo por ta ken ku bo ke ta, pero si bo kometé un akto kriminal penal en prinsipio lo bo wòrdu persiguí i tresé dilanti mesa bèrdè meskos ku tur e otro kriminalnan. Ta keda na un abogado pa defendébo i kisas logra kubo por sali liber of baha bo straf of jega na kualke otro areglo ku Hues den bo kaso. Tur kos ta dependé tambe Kiko Ministerio Públiko lo akusábo di djé i ke prueba i deklarashonnan nan tin kontra di bo. Pero un kos ta sigur tin dos dia sigur ku lo bo keda detení ta depende si e sobra ocho dianan lo wòrdu ehersé si òf no. En total OM (Ministerio Públiko) por tenebo mas ku shen dia hasiendo investigashon.

Pues ya bosa, ora nos sinti ku sea nos hemut, òf nos wowo a bira skur, sali bo bai i konta un te dies, pasó e akshon ku bo tuma por ta bo desgrasia i bo no por halé bèk nunka mas. Violensha no ta e solushon pa nada! “Ora sentido di moral spiritual baha tur kos ta bai perdi!”

Kuida kurpa i nos tei semper pa bo!