Siman pasá mi a mira na TV, un abogado papia tokante un mener Syrio ku ta “asielzoeker” aki na Kòrsou; kiko ta un’ asielzoeker’ presís?, òf un hende ku ta buska ásilo òf ásilo politíko I dikon no por yuda e menér aki na Kòrsou?

Bon siman na tur mi fiel lesadónan di e kolumna aki. E fin di siman aki tabatin masha hopi aktividat ku mi mester a hasi akto di presensia, pero esei no a kita ku mi a traha tempu pa atendé tur e preguntanan ku mi ta haña tur siman. De paso, danki na tur e pregunta I sostennan ku mi ta hañando komo líder nobo di Partido Demokrat. Kada un di bosnan su sosten ta konta I mi sa, ku riba tur kos tin Ser Supremo ku ta bendishoná kada un di nos ku tin Kòrsou I su bienestar na pechu!

Pregunta di siman: siman pasá mi a mira na TV, un abogado papia tokante un mener Syrio ku ta “asielzoeker” aki na Kòrsou; kiko ta un’ asielzoeker’ presís?, òf un hende ku ta buska ásilo òf ásilo politíko I  dikon no por yuda e menér aki na Kòrsou?

Danki, pa e pregunta esaki ta un tema ku sigur ta hopi aktual últimamente na Oropa I Ulanda. Laga nos ban wak kiko, of ken ta un buskadó di ásilo.

Un buskadó di asilo ta un persona ku pa motibunan di inseguridat den su pais, ta bai un otro pais ku por duné seguridat. Falta di seguridat pa motibunan manera un ekonomia malu, falta di edukashon, korupshon, insufisiente salubridat públiko, ets, ku otro palabra tur loke ta krea inseguridat sosial. Tambe tin esnan ku ta buska asilo polítiko pa motibo di polítika.  Esnan aki ta pasó nan religion ta diferente, òf paso nan ta homosèksual òf pasó nan tin opinion diferente for di e establesimentu riba gobièrnu of polítika. Den e kaso di e mener Syrio ta paso tin un guera sivil den na pais.

Hulanda a sera dos tratadó ku yama ‘Vluchtelingenverdag van Genève’ i  ‘Europees verdrag voor de rechten van de mens’. E tradádonan aki ta enserá ku mester yuda buskadónan di ásilo ora nan drenta bo pais i sòru pa nan tin un mihó bida. Esei ta nifiká ku mester kumpli ku, e tratado aki.  Ku otro palabra, si Ulanda a traha sierto palabrashon e mester kumpli ku nan. Nos ta mirando ku Ulanda ta atende ku nan segun e stipulashonnan den lei.

Aki na Kòrsou no tin niun lei pa yuda e buskadó di asilo, ta p’esei ta difísil pa nos yuda e persona. Tin un instansha international, UNHCR (the UN High Commisioner for Refugees Agencies) ku ta protehá derechinan I  bienestar di refugiadonan. Nan ta sòru pa buskadónan di asilo, haña un pais seif pa biba aden mundialmente. I nan ta traha ku instanshanan na Kórsou pa yuda un buskadó di asilo  yena formulario p’asina e por bin na remarke pa bai biba na un otro pais. A base di un formulshon eksakto ku ta splika dikon nan ke bai un otro pais.

Pero tanten e persona ta na Kòrsou, e mester wordu dokumenta, pasó un persona o buskadó di asilo, tin un  derechi di eksistí digno i e mester ta den e posishon pa kuída su mes. Si Kórsou no tin un lei ainda, no ta nada pero loke si Kórsou tin ta ku nos tambe ta forma parti di e tratadó ku yama ‘Europees Verdrag voor de Rechten van de Mens’. Artíkulo 1 ta indiká esei spesífikamente. Awor ta keda na Minister di Hustisia pa atendé ku e persona aki y no lagé na miserikordia di otro sin p’ariba òf p’abou.

Pues ya bo sa,   semper mi ta na bosnan tur su disposishon pa duna informashon riba temanan ku ta di importansha pa kada un di nos. Te otro siman ku Dios Su Poder!