Ami ku mi rumannan no por komprondé otro ora yega na herensia di mi mama

Bon siman i bendishon na tur esnan ku ta sigui e kolumna aki. E siman aki nos ta trata un otro tema di aktualidat ku semper ta trese hopi pregunta ban wak:

Pregunta: “Señora nos ta sinku ruman i nos mama a bai sosega un aña pasá. Ami ku mi rumannan no por komprondé otro ora yega na herensia di mi mama. Mi mama a bai laga negoshi atras, i nos no konosé nos tata; semper mi mama a atendé tur kos. Nos a kria hopi dushi ku otro, pero esun mas grandi ta hasi manera e ta doño di tur kos. Kiko mi por hasi pa tur kos bai parti manera mester ta asina tur ruman ta haña loke nan meresé?

Masha danki pa e pregunta unu sigur hopi interesante, i laga mi kondoleer bo i bo rumannan ku pèrdida di bosnan mama. Laga nos ban wak e pregunta.

Den kaso ku un persona fayesé anto a keda heredero atras, mester buska un notario pa asina e notario hasi investigashon pa wak ken ta e herederonan òf ku kisas a keda un tèstament atras. E notaris ta buska na Kranshi un “verklaring van erfrecht”, ku e verklaring aki por mustra ken ta heredero si of no, i ku tin derechi si of no.

Si akaso esun ku a fayesé a laga un tèstament atras, e ora ei den e tèstament ta bisa ken ta heredero. Den e kaso aki heredero no nesesariamente ta yunan e por ta un amigu, un stichting, of un bon kousa den e kaso aki ta fásil pa bai na repartishon.

Si, no tin tèstament lei ta stipulá ken ta e herederonan, pero tin desakuerdo entre herederonan e situashon ta bira un tiki kompliká paso tin otro pasonan pa tuma. Promé paso mester chèk kon nan ke heredá e sistema di zuiver, verwerp òf benifisiaro. Si nan no ke duna aporte e ora ei mester bai serka un hues pa duna esnan ku no ke duna aporte un tempu pa nan tuma desishon kon nan ke aseptá e herensia. Awor ta yega e momentu pa un di e herederonan bai serka hues i pidi pa nombra un “vereffenaar” pa atendé ku e bienesnan i asina e herederonan por yega na un repartishon ku ta benifisiá tur e herederonan.

E prosedura aki ta unu ku por dura largu i ta kosta sèn, ta pesei ta bon fo’i kumisamentu ora rumanan ta uni ku otro, koperá ku otro i laga notario repartí e bienesnan segun lei. Si bosnan ta heredero i bo a aseptá e herensia no ta eksistí ku ruman ta haña mas ku e otro; tur kos ta wordu repartíden e kantidat di rumannan. Esnan ku a haña dimas tin di duna kuenta i rason  i paga bèk òf haña menos.

Pues ya bo sa, nunka ta fásil pero ora morto kai tene duru na bo rumannan i sigui stima otro ya pa tur kos sigui kana bon, paso kiko ku pasa bosnan ta keda ruman di otro. Te otro siman ku Dios su poder!!