Mi yu a bai subi palu mango di bisiña pa kue mango, e la slip kai riba e dak i kibra un parti di e dak. Awor nan ke kobrami; kiko mi mester hasi?

Bon siman na tur mi fiel lesadónan bon siman. Tur kos por pasa tur kaminda, pero realidat di bida ta duna nos kosnan ku hopi biaha nos no ta premirá ní desea. Esaki ta un di e tipo di kosnan ku sa pasa ora bo no ta spera. Lesa i bo ta komprondé mesora kiko mi kemen!

Pregunta, señora bondia mi yu a bai subi palu mango di bisiña pa kue mango, e la slip kai riba e dak i kibra un parti di e dak. Awor nan ke kobrami; kiko mi mester hasi?

Danki pa e pregunta, e temporada aki nos ta mira hopi fruta manera mispel, mango, kashu, tamarein, koko; rikesa di nos tur. Manera nos tur sa tambe desgrasia nunka ta leu i nos tur gusta kome fruta. Ban wak kiko bo deber i derechi ta den e situashon aki.

Na promé lugá mester definí e edad di bo yu paso lei ta definí ku si e mucha tin 16 aña pariba e mes ta responsabel pa e daño ku ela okashoná, su mayornan no tin e deber di paga. Un ehempel di esaki ta ku mayornan ta responsabel si nan yu ta kore auto sin reibeweis.

Si a kaso e mucha ta entre 14-16 aña, e mucha mes ta responsabel pa daño ku el a okashoná na tesera, anto huntu kun’é su mayornan tin falta den e sentido di kulpa, si nan no a supervisá e mucha sufisiente.

Ta keda na e mayornan pa mustra kunan no tabatin falta den e fayo ku e mucha kometé. Negligensha dor di no advertí e mucha na tempu pa un peliger, por pone ku mayornan ta kulpabel i hañá responsabel.

Pa e muchanan di 0-13 aña mayornan ta kompletamente responsabel pa daño hasí na tersera, den sentido di un “risico aansprakelijkheid” o sea responsabelidat hudisial.Den e kaso aki, lei no ta hasi e mucha responsabel.

Muchanan kuta bou di tutela (voogdij) of ku despues di divorsio un pariente tin responsabelidat hudisial (ouderlijkgezag) riba nan, e ora ei tantu e voogdes komo esun ku tin responsabilidat hudisial ta esnan ku ta responsabel in prinsipio. Den kaso ku e mucha despues di divorsio, tur dos mayor a keda ku responsabelidat hudisial i e ta biba serka un mayor e ora ei tur dos huntu ta keda responsabel in prinsipio. Den kaso ku tin daño ku un mucha a kousa i bo no sa presís ken ta responsabel buska asistensia hurídiko mes ora.

Pues ya bosa, tin hopi mucha ta kana riba kaya, ta sali anochi den grupo i hasta manera nos a kuminsá relatá ta bai subi dak pa kue mango i ata e problema a jega kas. Un seguro W.A.(wettelijkaansprakelijkheid o sea responsabelidat hudisial) por yuda segur, si a kaso a bo komo pariente pa lei ke da esun responsabel, Semper buska konseho serka un hurista. Te otro siman ku Dios su poder!